Langar við­ræður um landa­mærin og hernaðar­að­stoð skila „dauðu“ frum­varpi

Donald Trump, fyrrverandi forseti og núverandi forsetaframbjóðandi, hefur krafist þess af þingmönnum Repúblikanaflokksins að þeir samþykki engin frumvörp sem ætlað er að sporna gegn flæði farand- og flóttafólks yfir landamæri Bandaríkjanna og Mexíkó.

Er það vegna þess að hann vill nota málið í kosningabaráttu sinni gegn Joe Biden seinna á árinu og óttast að gefa Biden pólitískan sigur á kosningaári. Síðan þá hafa sífellt fleiri þingmenn Repúblikanaflokksins í báðum deildum þings lýst yfir efasemdum um viðræðurnar.

Frumvarpið felur í sér einhverjar umfangsmestu mögulegu aðgerðir á landamærum Bandaríkjanna og Mexíkó í áratugi.

Yrði það að lögum myndi það meðal annars gera farand- og flóttafólki erfiðara með að sækja um hæli í Bandaríkjunum, auka þann fjölda fólks sem hægt að halda föngnu á landamærunum og gera yfirvöldum kleift að loka landamærunum alfarið reyni fleiri en 8.500 manns að fara ólöglega yfir landamærin á einum degi eða fleiri en fimm þúsund á dag, að meðaltali yfir viku.

Frumvarpið myndi fjölga dómurum til að vinna úr fleiri hælisumsóknum á minni tíma.

Það felur einnig í sér umfangsmiklar fjárveitingar til hernaðaraðstoðar handa Úkraínumönnum og Ísraelum og til mannúðaraðstoðar á Gasaströndinni, svo eitthvað sé nefnt.

Áhugasamir geta kynnt sér frumvarpið betur hér á vef öldungadeildar Bandaríkjaþings.

Í desember reyndu um þrjú hundruð þúsund manns að komast yfir landamærin, sem er mesti fjöldi sem mælst hefur. Joe Biden, forseti, hefur sagt að um vandamál sé að ræða og kallað eftir aðgerðum frá þinginu.

Chuck Schumer, leiðtogi meirihlutans í öldungadeildinni, segir að fyrsta atkvæðagreiðslan um áðurnefnt frumvarp muni fara fram á miðvikudaginn.

Repúblikanar hafa neitað að samþykkja frekari hernaðaraðstoð til Úkraínu og reyndu upprunalega að nota aðstoðina sem vogarafl gegn Demókrötum til að ná fram forgangsmálum þeirra varðandi landamærin við Mexíkó. Það heppnaðist að miklu leyti þar sem Biden og aðrir Demókratar hafa komið töluvert til móts við Repúblikana.

Staðan breyttist svo töluvert þegar Trump lýsti því yfir að hann vildi gera landamærin að sínu helsta kosningamáli. Hann væri sá eini sem gæti lagað vandamálin á landamærunum.

Repúblikanar sem hafa stutt samkomulagið hafa þó sagt að um einstakt tækifæri sé að ræða. Þeir muni aldrei aftur geta fengið stuðning innan Demókrataflokksins fyrir svo miklum aðgerðum á landamærunum. Þó Repúblikanar væru í meirihluta í báðum deildum þings og Trump í Hvíta húsinu, þyrfti frumvarp um aðgerðir á landamærunum að fá sextíu atkvæði í öldungadeildinni.

Demókratar myndu aldrei veita þau atkvæði sem Repúblikanar þyrftu til að koma frumvarpi í gegn.

Sjá einnig: Semja ekki um landamærin til að grafa ekki undan Trump

Mike Johnson, forseti fulltrúadeildarinnar, hefur lýst því yfir að frumvarpið sé verra en hann hafi búist við. Varpar hann sökinni á vandræðunum á landamærunum á Biden og lýsir frumvarpinu sem dauðu, verði það yfir höfuð samþykkt í öldungadeildinni, sem er ekki víst.

Johnson lýsti því einnig yfir um helgina að hann ætlaði sér að leggja fram sérstakt frumvarp um 17,6 milljarða dala hernaðaraðstoð handa Ísraelum.