Kalla eftir að­komu lög­reglu og bruna­varna vegna olíusöfnunar í Vík

Þetta kemur fram í nýjustu fundargerð nefndarinnar, frá 21. mars síðastliðnum.

Málið rekur sögu sína til júlímánaðar 2020 þegar Heilbrigðiseftirliti Suðurlands barst starfsleyfisumsókn vegna framleiðslu á lífdísel frá félaginu Orkusjálfbærni ehf. Starfsleyfið var ekki afgreitt þar sem kröfum var ekki mætt.

„Engu að síður hefur umsækjandinn safnað miklu magni af matarolíu, ásamt annarri óskilgreindri úrgagnsolíu,“ segir í fundargerðinni.

Fram kemur að miðað við magn sé um að ræða olíu frá mismunandi atvinnurekstri. Olían sé nú geymd á þremur stöðum í sveitarfélaginu, og án heimilda.

„Athæfi þetta er þess eðlis að Heilbrigðisnefnd telur að sveitarfélagið, brunavarnir, heilbrigðiseftirlit og lögregla ásamt málsaðilum þurfi að koma að málinu,“ segir í fundargerðinni.

Þar kemur jafnframt fram að framkvæmdastjóra Heilbrigðiseftirlits Suðurlands hafi verið falið að fylgja málinu eftir.