Hunda­skítur fyrir utan kosningamiðstöð Baldurs vekur spurningar

Jón Kristinn Snæhólm, alþjóðastjórnmálafræðingur og stuðningsmaður Baldurs, kom á kosningamiðstöðina í gærmorgun og heyrði af atvikinu frá starfsfólki skrifstofunnar ásamt því að hann sá umræddan poka. Hann segir það hafið yfir allan vafa að óprúttnir aðilar standi að baki gjörningnum.

„Ég á hund og er búinn að eiga hund allt mitt líf og þeir skíta ekki í poka í því magni sem var þarna um borð og fara með það fyrir utan hurð á Grensásvegi,“ segir Jón í samtali við fréttastofu.

Furðufuglar á sveimi

Hann vakti fyrst athygli á málinu í færslu sem hann birti á síðu sinni á Facebook í gærkvöldi. Þar minnist hann á þetta leiðindaatvik og ýjar að því að það séu fordómar og hatur sem búa að baki ógjörningnum.

„Í morgun var fullum poka af hundaskít sturtað fyrir framan hurðina á kosningaskrifstofu okkar. Annarstaðar í heiminum er baráttufólki fyrir mannréttindum stungið í steininn, smánað og pyntað. Rísum undir nafni sem brautryðjendur frelsis, mannréttinda og mannhelgi. Horfum framan í heiminn og segjum stolt: Við þorum, við viljum og við getum,“ skrifar Jón Kristinn meðal annars.

Hann rifjar upp aðkastið sem Vigdís Finnbogadóttir varð fyrir í sinni kosningabaráttu og segir gjörninga sem þessa gamalkunnt stef.

„Það eru alltaf furðufuglar á sveimi í öllum prófkjörum og kosningum. Þú þarft að leggja á þig og skipuleggja svona gjörning. Þetta er ekkert sem þér dettur í hug sísvona. Þannig að þarna eru óvildarmenn eins og alls staðar,“ segir hann.

Jón Kristinn fullyrðir að það liggi enginn vafi á því að þetta hafi verið viljaverk og harmar að slíkir fordómar og hatur skuli finnist enn í íslensku samfélagi.

„Þetta er viljandi gert. Þetta er ekki nein tilviljun. Sumt er tilviljun háð en þetta er skipulagt. Þetta er mjög snemma um morguninn, það er búið að safna þessu saman og koma því fyrir þannig auðvitað er þarna hópur einstaklinga sem er að gera þetta. Eins leiðinlegt og það er,“ segir hann.

Frekar latur hundaeigandi en óvildarmaður

Heimir Hannesson, meðlimur kosningateymis Baldurs Þórhallssonar, er ekki eins viss um að óprúttinn aðili sé þarna á ferð. Hann segir í samtali við fréttastofu að hann telji 95 prósent líkur á því að þarna sé latur hundaeigandi á ferð frekar en óvildarmaður. 

„Ég var að tala við konuna sem kom að þessu og spurði: „Ertu hundrað prósent á að þetta hafi verið sett þarna“ og hún sagði: „Nei alls ekki.“ Það getur alveg verið einhver hundaeigandi sem var með kúk í poka og pokinn rifnaði. Ég hef enga trúa á því að þetta sé eitthvað samsæri,“ segir Heimir.

Sólborg Guðbrandsdóttir, annar meðlimur kosningateymis Baldurs, segir að hafi þetta verið verk hunds þá hafi sá hundur verið ansi stór. 

„Þetta var beint fyrir utan skrifstofuna. Maður þorir ekkert að fullyrða um hvort þetta hafi verið tilviljun eða ekki en fólk er víst til alls,“ segir hún í samtali við fréttastofu.