Blikar minnkuðu um leið forskot Víkinga á toppnum í aðeins eitt stig auk þess að liðin eru með mjög svipaða markatölu, 27-12 hjá Víkingi á móti 26-13 hjá Blikum. Spennan er því orðin mikil á toppnum.
Viktor Karl Einarsson trúlofaði sig í landsleikjahlénu og hann hélt upp á það með laglegu marki eftir að hafa dansað aðeins með boltann í vítateignum.
Viktor Karl átti einnig stóran þátt í fyrra marki Blika þegar sending hans sprengdi upp vörn KA áður en Aron Bjarnason gaf fyrir og Kári Gautason varð fyrir því óláni að setja boltann í eigið mark.
Sjálfsmarkið kom tveimur mínútum fyrir hálfleik en Hallgrímur Mar Steingrímsson jafnaði fyrir KA-menn eftir aðeins sex mínútna leik í seinni hálfleik.
Viktor Karl gerði aftur á móti út um leikinn þegar hann skoraði á 74. mínútu.
Viktor Karl trúlofaðist körfuboltakonunni Jónínu Þórdísi Karlsdóttur á dögunum. Svona eiga menn að halda upp á slík tímamót en Viktor hefur átt mjög gott sumar með Breiðabliksliðinu.
Það má sjá öll mörkin úr leiknum hér fyrir neðan.
