Fjalla um níu milljarða króna Ís­lendinginn

Orri er í hópi tólf leikmanna sem að Tom Collomosse hjá Daily Mail fjallar sérstaklega um og segir að séu nú þegar í sigti ensku úrvalsdeildarfélaganna.

Hann bendir á að FC Kaupmannahöfn hafi þegar hafnað tilboðum í Orra, upp á um 15 milljónir punda eða 2,7 milljarða króna, og vilji fá meira. Félagið hafi raunar metið Orra meira virði en Rasmus Höjlund, sem síðan var seldur frá félaginu og er núna leikmaður Manchester United.

„Eftir tvö ár verður hann [Orri] 50 milljóna punda framherji,“ hefur Collomosse eftir sérfræðingi í evrópskum leikmannamálum, en sú upphæð jafngildir tæplega 8,9 milljörðum króna.

Fjallað um fjölskylduna og Hákon

Í greininni er einnig bent á að Orri sé úr mikilli íþróttafjölskyldu og hafi verið efnilegur handboltamaður en valið fótboltann. Þar hafi hann 13 ára verið kominn inn í meistaraflokk Gróttu, en Orri lék þar sumarið 2019 (þá 14 að verða 15) undir stjórn pabba síns, Óskars Hrafns Þorvaldssonar. Í greininni kemur fram að Óskar hafi einmitt einnig verið fótboltamaður, og það sé yngri systir Orra (Emelía, leikmaður Köge í Danmörku) einnig. Móðirin (Laufey Kristjánsdóttir) hafi hins vegar verið í handbolta.

Collomosse bendir einnig á vinskap þeirra Hákons Arnars Haraldssonar og Orra, en þeir léku saman hjá FCK, og segir að Hákon hafi átt prýðisgott fyrsta tímabil með Lille í Frakklandi síðasta vetur. Segir hann að það kæmi ekkert á óvart þó að báðir yrðu orðnir leikmenn í ensku úrvalsdeildinni innan tveggja ára.

Næsti leikur Orra með FCK gæti orðið á morgun þegar liðið mætir Banik Ostrava í Sambandsdeild Evrópu.

Aðrir leikmenn á listanum hjá Daily Mail eru:

• Yarek Gasiorowski, 19 ára miðvörður Valencia
• Mattia Liberali, 17 ára sóknarsinnaður miðjumaður AC Milan
• Sverre Nypan, 17 ára miðjumaður Rosenborg
• Oscar Perea, 18 ára kantmaður Strasbourg
• Jeremy Jacquet, 19 ára miðvörður Rennes
• Adam Daghim, 18 ára sóknarmaður RB Salzburg
• Franco Mastantuono, 16 ára miðjumaður River Plate
• Alessandro Longoni, 16 ára markvörður AC Milan
• Bilal El Khannouss, 20 ára miðjumaður Genk
• Mario Stroeykens, 19 ára miðjumaður Anderlecht
• Bazoumana Toure, 18 ára kantmaður Hammarby