ECIT AS kaupir meiri­hluta í Bókað frá KPMG

Þar segir að 80 manns starfi hjá Bókað og að það sinni þjónustu við um tvö þúsund fyrirtæki og stofnanir um land allt. Engar breytingar eru samkvæmt tilkynningu fyrirhugaðar samhliða kaupunum í mannahaldi eða starfsstöðvum Bókað né heldur í þjónustuþáttum gagnvart viðskiptavinum.

Framkvæmdastjóri félagsins verður Birna Mjöll Rannversdóttir sem hefur verið sviðsstjóri bókhaldssviðs KPMG til fjölda ára og verið meðeigandi hjá KPMG frá árinu 2015.

„Það er mikilvægt fyrir okkur að geta boðið okkar viðskiptavinum bestu lausnir í bókhalds- og launaþjónustu sem völ er á og þar stendur ECIT AS vel að vígi. Við viljum skerpa á þjónustuframboði KPMG í samræmi við áherslur félagsins á alþjóðavettvangi á sviði endurskoðunar, reikningsskila, ráðgjafar, lögfræði- og skattaþjónustu. Við stefnum að því að sækja enn frekar fram á okkar sérsviði og það er mikilvægt að eiga í samstarfi við öflugt félag á sviði launavinnslu og bókhaldsþjónustu til að geta tryggt viðskiptavinum okkar áfram þjónustu á breiðum grunni,“ segir Hlynur Sigurðsson, framkvæmdastjóri KPMG.

ECIT hefur starfað á Íslandi frá árinu 2023 og hefur áður fjárfest í fjármálaþjónustu og bókhaldsfyrirtækinu Virtus auk smærri eininga á sviði bókhalds- og launaþjónustu. Starfsfólk ECIT á Íslandi mun samtals telja um 110 eftir að kaupin ganga í gegn.

„Þessi kaup á Bókað styrkja enn frekar stöðu og þjónustu ECIT í bókhalds- og launaþjónustu á Íslandi. Það er með mikilli ánægju sem við bjóðum viðskiptavini og starfsfólk Bókað velkomin til ECIT,“ segir Peter Lauring, stofnandi og forstjóri ECIT AS.

ECIT AS er með yfir 2.500 starfsmenn á yfir hundrað skrifstofum í tíu löndum. Auk bókhalds- og launavinnslu veitir félagið víðtæka þjónustu á sviði upplýsingatækni og viðskiptalausna. Árstekjur ECIT samstæðunnar eru um 47 milljarðar króna. Hjá ECIT Virtus starfa ríflega 30 manns á Íslandi sem sinna víðtækri þjónustu við ríflega 1.000 viðskiptavini.