Hótar hörðum við­brögðum hafi Rússar tekið Ástrala af lífi

Þá birtu rússneskir hermenn myndband á netinu sem sýndi Jenkins bundinn. Verið var að yfirheyra hann og mátti sjá rússneskan hermenn berja hann á myndbandinu.

Síðan þá hefur ekkert frést af Jenkins og hafa fregnir borist af því að hann hafi verið drepinn af rússneskum hermönnum. Ríkisútvarp Ástralíu sagði nýverið frá því að vinir Jenkins í Úkraínu væru sannfærðir um að hann og þrír eða fjórir félagar hans hafi verið drepnir skömmu eftir að þeir voru handsamaðir.

Einn bandarískur maður sem barðist með Jenkins sagðist hafa séð mynd af líki hans og að hann hefði borið kennsl á það vegna húðflúrs sem Ástralinn var með á hendinni.

Bíða eftir staðreyndum

Albanese segir dauða Jenkins ekki hafa verið staðfestan og að erindrekar Ástralíu séu að reyna að komast til botns í málinu. Hann hefur kallað eftir svörum frá yfirvöldum í Rússlandi.

„Við munum bíða eftir staðreyndum. En ef Oscar Jenkins hefur hlotið einhvern skaða, er það forkastanlegt og ástralska ríkisstjórnin mun grípa til hörðustu mögulegu aðgerða,“ sagði Albanese við blaðamenn í gær.

Hann sagði ekkert um það hvernig aðgerðir um væri að ræða.

Hér að neðan má sjá sjónvarpsfrétt ABC News frá því í gær.

AP fréttaveitan hefur eftir sérfræðingum að mögulega gætu Ástralar kallað sendiherra sinn í Rússlandi heim og rekið rússneska sendiherrann aftur til Rússlands. Það hefur Peter Dutton, leiðtogi stjórnarandstöðunnar í Ástralíu, sem gæti orðið forsætisráðherra eftir kosningar í maí, lagt til.

Að minnsta kosti sjö Ástralar hafa fallið í átökum í Úkraínu, þar sem þeir hafa barist með Úkraínumönnum. Jenkins er þó sá eini sem talinn er hafa verið tekinn af lífi eftir að hafa verið handsamaður.

Þá hafði hann enga reynslu af hernaði áður en hann fór til Úkraínu en hann var 32 ára gamall og starfaði sem kennari áður en hann gekk til liðs við alþjóðlegu hersveitina svokölluðu í Úkraínu, samkvæmt umfjöllun Ríkisútvarps Ástralíu.

Sífellt fleiri aftökur

Frá því innrás Rússa í Úkraínu hófst hafa rússneskir hermenn ítrekað birt myndir og myndbönd af aftökum á úkraínskum hermönnum.

Flestir hafa verið skotnir til bana en þessi myndbönd hafa meðal annars sýnt þegar rússneskur hermaður skar undan bundnum úkraínskum hermanni og skaut hann svo í höfuðið. Öðru sinni birtu rússneskir hermenn myndband af því þegar þeir skáru höfuðið af lifandi úkraínskum hermanni.

Sjá einnig: Tóku tíu úkraínska fanga af lífi

Aftökum þessum virðist hafa fjölgað verulega á undanförnum mánuðum og hafa Úkraínumenn haldið því fram að þær séu kerfisbundnar. Að hermönnum hafi verið skipað að taka úkraínska stríðsfanga af lífi eða það sé að minnsta kosti liðið af yfirmönnum rússneska hersins.

Í lok síðasta árs sögðust embættismenn í Úkraínu vita til þess að að minnsta kosti 147 úkraínskir stríðsfangar hafi verið teknir af lífi af rússneskum hermönnum frá því innrás Rússa hófst í febrúar 2022. Þar af voru 127 teknir af lífi í fyrra.

Ekki er vitað til þess að rússneskum hermönnum hafi verið refsað fyrir aftökur á úkraínskum stríðsföngum.