Selenskí þakkar fjórum sinnum fyrir sig

Hann þakkar Bandaríkjunum fyrir stuðning þeirra og fyrir móttökurnar. Hann þakkar einnig forsetanum, þinginu og bandarísku þjóðinni.

Leiðtogarnir funduðu í Hvíta húsinu í dag og við lá að upp úr syði. Blaðamannafundi sem halda átti eftir fundinn hefur verið aflýst. Trump sagði án frekari skýringa að vopnahlé í Úkraínu væri í sjónmáli, en að Evrópa yrði að leggja meira af mörkum til að styðja Úkraínu.

Hann sagði einnig í færslu á samfélagsmiðlum í kjölfar fundarins að Selenskí væri ekki búinn undir frið.

Í yfirlýsingu sinni þakkar Selenskí fyrir sig fjórum sinnum.

„Takk fyrir Bandaríkin, takk fyrir stuðninginn, takk fyrir þessa heimsókn. Ég þakka Bandaríkjaforseta, Bandaríkjaþingi og bandarísku þjóðinni. Úkraína þarf á réttlátum og varanlegum friði að halda og það er akkúrat það sem við erum að vinna að,“ segir Selenskí.