Fjölga flugmóðurskipum og herþotum í Mið-Austurlöndum

Spenna milli ríkisstjórnar Donalds Trump og klerkastjórnarinnar í Íran hefur aukist nokkuð að undanförnu. Klerkastjórnin hefur staðið við bakið á Hútum í Jemen og þá hefur Trump einnig talað um að klerkastjórnin megi ekki koma upp kjarnorkuvopnum.

Á sunnudaginn hótaði Trump árásum á Íran og refsiaðgerðum, ef klerkastjórnin gerði ekki samkomulag við Bandaríkin um kjarnorkuvopnaáætlun ríkisins.

Það sem tilkynnt var í gærkvöldi var að veru flugmóðurskipsins Harry S. Truman og meðfylgjandi flota í Mið-Austurlöndum yrði framlengd. Þar að auki yrði flugmóðurskipið Carl Vinson einnig sent á svæðið auk fleiri flugsveita og loftvarnarkerfa.

Í yfirlýsingu frá ráðuneytinu er haft eftir talsmanni þess að Pete Hegseth, varnarmálaráðherra, hafi gert ljóst að muni Íranar eða leppar þeirra ógna Bandaríkjamönnum eða hagsmunum Bandaríkjanna, verði gripið til aðgerða.

Gervihnattamyndir hafa einnig sýnt að minnst sex B-2 sprengjuflugvélum hefur verið flogið til flugstöðvar Bandaríkjanna á Diego Garcia á Indlandshafi. Þær sprengjuvélar geta borið kjarnorkuvopn og sprengjur sem hannaðar eru til að granda styrktum neðanjarðarbyrgjum.

B-2 Spirit eru meðal þeirra háþróuðustu í heimi en mjög erfitt er að sjá þær á ratsjám. Þær hafa verið notaðar til að varpa sprengjum á neðanjarðarbyrgi Húta í Jemen. Þær yrðu nauðsynlegar til að gera árásir á kjarnorkustöðvar í Íran.

Sprengjurnar sem notaðar yrðu til að granda niðurgröfnum kjarnorkurannsóknarstofum í Íran kallast GBU-57 eða „MOP“, sem stendur fyrir „Massive Ordnance Penetrator“. Þær eru rúm tólf tonn að þyngd og sex metra langar.

Ali Khamenei, æðsti leiðtogi Íran, lýsti því yfir á mánudaginn að ef Bandaríkjamenn gerðu árásir á Íran yrði þeim svarað af mikilli hörku. Yfirmenn byltingarvarðar Íran hafa slegið á svipaða strengi og hótað alvarlegum afleiðingum, verði gerðar árásir á Íran.

Á hans fyrsta kjörtímabili dró Trump Bandaríkin frá samkomulagi sem mörg af stærstu ríkjum heims gerðu við Íran árið 2015 sem ætlað var að setja takmarkanir á þróun klerkastjórnarinnar á kjarnorkuvopnum í skiptum fyrir niðurfellingu viðskiptaþvingana.

Trump beitti þá Íran aftur umfangsmiklum refsiaðgerðum. Hann lét einnig ráða íranska herforingjann Qassim Soleimani af dögum en hann var talinn næst valdamesti maður Íran. Klerkastjórnin í Íran hefur á undanförnum árum verið sökuð um ráðabrugg um að ráða Trump af dögum.

Frá því Trump rifti kjarnorkusamkomulaginu hafa íranskir kjarnorkuvísindamenn aukið auðgun úrans umtalsvert og takmörkuðu samhliða því aðgengi eftirlitsaðila að kjarnorkurannsóknarstöðvum sínum.

Til að framleiða kjarnorkuvopn þarf að auðga úran í 90 prósenta hreinleika og hafa fregnir borist af því að Íranar eigi mikið af auðguðu úrani sem tiltölulega auðvelt væri að koma í níutíu prósent hreinleika.

Ráðamenn í Ísrael hafa lengi sakað Írana um að ætla sér að koma upp kjarnorkuvopnum og gerðu þeir árásir á leynilega rannsóknarstöð í Íran í fyrra. Það var gert samhliða umfangsmiklum árásum á loftvarnarkerfi og eldflaugaframleiðslu Írans, eftir að Íranar skutu fjölda skotflauga að Ísrael.