Njósnaaðgerðir sagðar tengjast deilum tveggja af auðugustu mönnum landsins

Greint var frá þessu í fréttaskýringaþættinum Kveiki á Rúv í kvöld.

Þessar aðgerðir eru sagðar hafa farið fram á þriggja mánaða tímabili haustið 2012. Björgólfur Thor er sagður hafa staðið að baki þeim. Þær hafi beinst að hópi fólks, fyrrverandi hluthöfum Landsbankans, sem voru þá í málaferlum gegn Björgólfi, sem var stærsti eigandi hans.

Í fyrra lauk því máli með um milljarðs króna sáttagreiðslum Björgólfs til hluthafanna. Björgólfur viðurkenndi þó enga sök, en hann hafði verið sakaður um að leyna hluthöfum bankans mikilvægum upplýsingum.

Sjá nánar: Björg­ólfur lýkur hópmálsókn með milljarðssátt

Í Kveik segir að Björgólfur hafi beðið um áðurnefndar njósnaaðgerðir frá félaginu PPP sf. Hann hafi talið að hópmálsóknarfélagið væri á snærum Róberts Wessman, og vildi sanna það. Jafnframt hafi hann viljað komast að því hvernig félagið hefði fengið gögnin sem stefna þess byggði á.

Fram kemur að PPP sf. hafi verið stofnað ári áður en njósnaaðgerðirnar fóru fram. Það hafi verið tveir þáverandi lögreglumenn sem stofnuðu það.

Þá hafi lögreglumaður fengið greitt fyrir að taka þátt í aðgerðunum sömu daga og hann var að störfum hjá lögreglunni. Greint var frá því fyrr í dag að sá maður hefði verið leystur undan starfskyldu hjá lögreglunni í gær eftir að Kveikur spurðist fyrir um málið hjá lögreglunni.

Falin myndavél í kókómjólkurfernu

Aðalmarkmiðið hafi verið að ná myndum af Róberti og Vilhjálmi Bjarnasyni, fyrrverandi þingmanni, og Ólafi Kristinssyni lögmanni saman. Þeir tveir síðarnefndu voru forsvarsmenn málsóknarfélagsins. Fylgst hafi verið með ferðum þessara manna og annarra með umfangsmiklum hætti.

Bílar, heimili og vinnustaðir hafi verið vaktaðir. Umfangsmest hafi verið aðgerð við lögmannsstofuna Landslög þar sem bílaleigubíl, sem hafi reglulega verið skipt út fyrir annan, hafi verið komið fyrir með falda myndavél í kókómjólkurfernu í glugga bílsins sem fylgdist með aðalinngangi stofunnar.

Í frétt Rúv mátti sjá myndefni sem virtist tekið úr launsátri sem sýndi til dæmis Vilhjálm, Ólaf og Róbert.

Á meðal gagna Rúv er upptaka af samtali Birgis Más Ragnarssonar, þáverandi framkvæmdastjóra Novators, við stofnendur PPP, Jón Óttar Ólafsson og Guðmund heitinn Gunnarsson. Þar eru þeir sagðir hafa kynnt hvernig þeir myndu haga njósnunum.

Jón Óttar og Guðmundur störfuðu hjá sérstökum saksóknara en voru kærðir fyrir að stela og selja gögn frá embættinu og létu þá af störfum. Síðar var fallið frá kærunni. Jón Óttar hefur jafnframt vakið athygli fyrir störf sín fyrir Samherja.

Fréttin hefur verið uppfærð.