Ráð­herra vill að leigu­bíls­stjórar tali ís­lensku

„Löggjöfin var er algjört klúður og leiddi ekki til neins góðs fyrir íslenskt samfélag. Ástandið er vegna löggjafarinnar sem samþykkt var 2022. Ástandið var ekki svona.“

Eyjólfur segist hafa tekið þátt í umræðunum á sínum tíma.

„Ég man að ég var þarna eitt kvöldið ásamt formanni mínum Ingu Sæland og var að berjast gegn þessu. Leigubílsstjórar voru fyrir utan á flautunni eins og enginn væri morgundagurinn. Við vorum að vara við þessu. Ég kalla þetta kjánafrelsi. Það er mikil ábyrgð að keyra fólk á milli staða, tala nú ekki um aldraða, öryrkja og ölvað fólk. Frelsið átti að leysa þetta en þetta er orðið miklu verra. Ég tel að það sé eftirlitsleysi og lagaramminn sé ekki nógu öruggur til að tryggja öryggi farþega.“

Allt rangt sem Áslaug Arna sagði fyrir tveimur árum

Umsjónarmenn Bítisins lásu upp gamlan status frá Áslaugu Örnu Sigurbjörnsdóttur nú þingkonu Sjálfstæðisflokksins þar sem hún lofaði breytingarnar í hástert og sagði þær leysa margvíslegan vanda.

„Þetta er allt saman rangt. Hver einasti liður,“ sagði Eyjólfur. Hann sagði að ekki væri með lagabreytingum núna verið að innleiða gamla kerfið.

„Það er lagaákvæði um endurskoðun laganna og ég fór strax fram á það í mínu ráðuneyti að endurskoðun yrði hafin. Við viljum tryggja öryggi farþega og það er stærsta vandamálið.“

Eins og fram hefur komið í fréttum kemur stöðvaskylda aftur inn og ekki má lengur reka bíl án tengingar við stöð sem sinnir ákveðnu eftirlitshlutverki. Rafræn skráning sem skráir upphaf og lok ferðar auk gjalds verður tekin upp. Auk þess sem stöðin heldur utan um upplýsingar um bílsstjórana.

Vill að leigubílsstjórum verði gert að læra íslensku

Eyjólfur sagði jafnframt að tungumálakunnátta kæmi til álita og að hann hefði litið sérstaklega til nágrannalandanna, hvernig þau hagi þessu og nefndi hann sérstaklega Noreg, Danmörku og Bretland. En allt snúist þetta um öryggi farþeganna, það væri lykilatriði. Í þessum löndum taki menn ekki meirapróf án þess að kunna tungumálið.

„Á Bretlandi er forsenda fyrir því að leigubílsstjórar kunni ensku. Hvers vegna ekki að prófið verði tekið á íslensku?“

Eyjólfur spurði hvers vegna þessu ætti að vera öðru vísi farið á Íslandi.

„Þetta er þjónusta við landsmenn. Skilyrði til að vera leigubílsstjóri eru þau að þú takir próf á íslensku. Það er töluð íslenska hér og af hverju viljum við vera að finna upp hjólið?“

Heimir Karlsson útvarpsmaður sagðist hafa tekið leigubíl með erlendum leigubílsstjóra sem virtist heiðvirður náungi en hann hefði bara talað ensku.

„Hann getur lært íslensku. Ég óska engum þess að búa á Íslandi án þess að tala íslensku. Það er grundvallaratriði að tala málið sem talað er í því ríki sem þú býrð.“

Svindlað á meiraprófinu

Eyjólfur sagðist hafa skilið þetta svo að það væri einfaldlega svindlað á þessum prófum.

„Endalausar sögur. Þetta próf var á íslensku. Hvernig getur þú tekið prófið á íslensku ef þú skilur ekki málið? Við erum að vinda ofan af þessari vitleysu og dellu, ef prófið er tekið á íslensku og viðkomandi kann ekki staf í málinu?“

Ráðherra sagðist hafa óstaðfestar heilmildir fyrir því að menn geti haft túlk sér við hlið og notað símann til að fá aðstoð.

„Mér finnst þreytandi að heyra að við ætlum að gera þetta öðruvísi en í öðrum ríkjum.“

Eyjólfur gerir ekki ráð fyrir öðru en að þær breytingar sem eru nú fyrirliggjandi renni í gegnum þingið. Og svo þarf að halda áfram.

„Þetta er svona í Noregi, Danmörku og á Bretlandi. En við erum að skoða þetta nánar. Mér finnst þetta eitt af grundvallaratriðum í málinu,“ sagði Eyjólfur.

„Þetta snýst ekki um rasisma eða útlendingahatur. En mér finnst þessi umræða, til dæmis með kaffihús, að því hafi verið breytt í bænahús fráleit. ISAVIA verður að vera skýrara í svörum. Þetta átti að vera kaffi- og salernisaðstaða og svo er bara búið að taka þetta yfir? Og að það megi ekki tala um þetta?“