„Við getum ekki hlaupið um heiminn í leit að Pútín“

Þannig vildu Úkraínumenn í það minnsta reyna að taka fyrstu skrefin í átt að vopnahléi.

„Við getum ekki hlaupið um heiminn í leit að Pútín,“ sagði Selenskí við blaðamenn í Ankara. „Ég finn fyrir vanvirðingu frá Rússlandi. Enginn fundartími, engin dagskrá, lágt sett sendinefnd. Þetta er persónuleg vanvirðing, við Erdogan, við Trump.“

Sendinefndin úkraínska verður leidd af Rustem Umeron, varnarmálaráðherra Úkraínu, og segir Selenskí að helsta forgangsatriði þeirra verði að ná fram vopnahléi.

Hann segir aðgerðir Rússa og sendinefnd þeirra í Tyrklandi sýna fram á að Pútín hafi ekki áhuga á að binda enda á innrás Rússa í Úkraínu, þó þeir hafi sjálfir lagt viðræður til, eftir að Pútín hafnaði tillögu Donalds Trump um að samþykkja þrjátíu dag almenn vopnahlé.

Sú rússneska er leidd af þeim Vladimír Medínskí, aðstoðarmanni Pútíns, og Alexander Fomin, aðstoðarvarnarmálaráðherra. Það eru sömu menn og forsetinn sendi til Tyrklands í mars 2022 til að ræða uppgjöf Úkraínu.

Þeim viðræðum var hætt þegar rússneskir hermenn hörfuðu frá Kænugarði og norðurhluta Úkraínu og ódæði rússneskra hermanna í bæjum eins og Bucha litu dagsins ljós.

Fyrr i dag kallaði Sergei Lavrov, utanríkisráðherra Rússlands, Selenskí aumkunarverðan og María Sakaróva, talskona utanríkisráðuneytisins, kallaði hann trúð og sagði hann glataðan. Var það eftir að Selenskí gagnrýndi sendinefnd Rússa og sagði hana til lítils annars en skrauts.

Viðurkenna ekki kröfur Rússa

Eftir fund sinn með Erdogan í dag ræddi Selenskí við blaðamenn þar sem hann sagði meðal annars að Úkraínumenn myndu aldrei viðurkenna yfirráð Rússa yfir þeim svæðum sem þeir hafa hernumið.

Rússar hafa ítrekað lagt fram kröfur um formleg yfirráð yfir fjórum héruðum sem þeir stjórna þó eingöngu að hluta, auk Krímskaga, sem þeir hernumu árið 2014.

„Þetta er úkraínskt land,“ sagði Selenskí.

Selenskí sagði einnig að hann ætti von á því að í refsiaðgerðir yrðu hertar enn frekar á Rússa, vegna mótspyrnu þeirra varðandi það að binda enda á stríðið í Úkraínu.

Leiðtogar nokkurra ríkja Evrópu hafa sagt að það verði gert.

„Þetta getur ekki verið einhliða,“ sagði Selenskí. „Þrýstingurinn má ekki vera einhliða. Þess vegna viljum við sjá þrýsting á Rússland og Pútín. Refsiaðgerðir frá Evrópu, frá Bandaríkjunum og öðrum ríkjum.“