Sig­ríður svarar gagn­rýni á störf lög­reglunnar á Suður­nesjum

Úlfar hefur frá því að hann hætti sem lögreglustjóri, og áður, gagnrýnt landamæravörslu á Íslandi og gagnrýnt að ekki hafi fengist farþegaupplýsingar frá öllum þeim flugfélögum sem hingað fljúga. Í nýlegu viðtali í Spursmálum kallaði hann eftir því að Sigríður Björk segði af sér og sagði hátt setta embættismenn innan dómsmálaráðuneytisins getulausa til að taka á málefnum landamæranna.

Í bréfi Sigríðar Bjarkar til starfsmanna fer hún ítarlega yfir þróun landamæraeftirlits og, meðal annars, stofnun sérstakrar deildar með það verkefni, PIU einingar, sem hafi verið stofnuð, meðal annars, til að „tryggja aðgengi löggæsluyfirvalda að farþegaupplýsingum og vinnslu á þeim“.

Einingin hafi verið samstarfsverkefni ríkislögreglustjóra, tollsins og lögreglustjórans á Suðurnesjum en samkvæmt því átti hann að leggja mannskap í verkefnið. Hann hafi ekki gert það og því hafi samningnum verið rift síðustu áramót og nýr samningur gerður á milli ríkislögreglustjóra og Skattsins en tollstjóri sé hluti af því embætti. Farþegaupplýsingunum hafi verið miðlað til tollsins í þessu samstarfi en nú eigi að breyta lögum sem herða slík upplýsingaskil og þá verði lögregla með forræði á upplýsingunum.

Sigríður segir í bréfi sínu að til að tryggja áframhaldandi samstarf verði deildin í framhaldinu vistuð hjá Skattinum og yfirmaður deildarinnar verði með viðveru hjá Skattinum og hjá ríkislögreglustjóra á Rauðarárstíg.

Sigríður ítrekar í bréfi sínu hlutverk og ábyrgð hvers embættis í landamæraeftirliti.

„Landamæravarsla er í höndum lögreglu og Landhelgisgæslu Íslands en tollstjóri, nú Skatturinn, fer með eftirlit með vöru. Landamæravarsla og tolleftirlit eru mikilvægur og órjúfanlegur hluti af öryggismálum þjóðarinnar,“ segir hún í bréfinu.

Miður að starfsfólk á Suðurnesjum sé gagnrýnt

Þá segir hún miður að heyra gagnrýni á starfsfólks hjá lögregluembættinu á Suðurnesjum. Sjálf var hún lögreglustjóri þar frá 2009 til 2014 og hvetur starfsfólk í bréfinu til að lesa ársskýrslur embættisins frá þeim tíma. Hún segir áskoranir samfélagsins hafa verið allt aðrar en í dag og telur upp helstu verkefni á þeim tíma.

Þá segir hún Margréti Kristínu Pálsdóttur, settan lögreglustjóra í embættinu, vel til þess fallna að sinna þessum verkefnum. Hún hafi til dæmis komið að stofnun landamæradeildar embættisins á sínum tíma. Margrét er sett í embætti þar til í október en sagði sjálf í viðtali eftir skipun að hún gerði ráð fyrir því að búið yrði að skipa nýjan lögreglustjóra fyrir þann tíma. Sjálf var hún skipuð aðstoðarlögreglustjóri til fimm ára í fyrra.

Útlendingamál séu í ólestri

Úlfar gagnrýndi einnig þegar Margrét Kristín var skipuð í embættið eftir að hann hætti og sagði gengið fram hjá Öldu Hrönn Jóhannsdóttur, yfirlögfræðingi á Suðurnesjum. Eiginmaður Öldu Hrannar og fyrrverandi lögreglumaðurinn, Gestur Pálmason, hefur tekið undir gagnrýni vegna landamæraeftirlits og útlendingamála. Hann var gestur í hlaðvarpi Sölva Tryggvasonar nýlega þar sem hann sagði stjórnvöld hafa misst stjórn á útlendingamálum.

Í bréfi sínu til starfsmanna segir Sigríður fjölmargar skýrslur til um málefni landamæra en embættin vinni nú eftir landsáætlun sem öll lögregluembættin hafi komið að. Það skorti enn fjármagn í framkvæmdaáætlun en þau voni að úr því verði bætt.

Hún segir landamæraeftirlit þó ekki einungis snúa að flugvöllum og minnir á að þeir sem eru stöðvaðir á landamærum vegna brotastarfsemi séu ekki endilega þau sem hagnist á henni eða stýri henni. Það þurfi samhent átak lögregluliða til að ná tökum á skipulagðri glæpastarfsemi.