„Þakk­látur fyrir að konan sé til­búin að leyfa mér að upp­lifa þetta“

Arnar gerir tveggja ára samning við Körfuknattleiksdeild Tindastóls en hann skrifaði undir samninginn á Hótel Varmahlíð í dag. Arnar hefur undanfarið ár starfað sem Afreksstjóri KKÍ en þar áður þjálfaði hann Stjörnuna frá árinu 2018.

Arnar gerði Stjörnuna að bikarmeisturum í þrígang og tvívegis varð liðið deildarmeistari undir hans stjórn.

Mikil tilhlökkun

Tindastóll tapaði fyrir Stjörnunni í oddaleik á heimavelli í úrslitaeinvígi Bónus deildar karla í vor.

„Ég er bara spenntur og hef langað lengi til að starfa hérna. Það er bara mikil tilhlökkun og þakklæti fyrir að fá tækifæri,“ sagði Arnar Guðjónsson í viðtali í kvöldfréttum Stöðvar 2.

Er mikil pressa að taka við liði sem spilar í úrslitum og tapar?

„Það er alltaf pressa í þjálfun. Menn þurfa bara að vita hvað þeir vilja standa fyrr og reyna að vinna þannig. Það er það sem við munum gera hér,“ sagði Arnar.

Öll fjölskyldan flytur

„Ég kem bara með haustinu og fjölskyldan kemur síðan eitthvað aðeins seinna. Við ætlum að flytja öll fjölskyldan því annars hefði þetta aldrei gengið upp,“ sagði Arnar.

„Ég er þakklátur fyrir að konan sé tilbúin að fylgja mér og leyfa mér að upplifa þetta því mig hefur lengi langað þetta,“ sagði Arnar.

Hann veit ekki hvort hann klárar sumarið með KKÍ en karlalandsliðið er á leiðinni á Eurobasket.

„Það í rauninni kemur í ljós á næstu dögum. Þetta kom mjög hratt upp á,“ sagði Arnar.

Það verða augljóslega breytingar

En hvað með leikmannamál Stólanna?

„Við verðum með einhverja karla það gefur augaleið. Þeir sjá um að tilkynna það á næstu dögum hverjir endursemja og hvort við fáum einhverja nýja hesta í þetta. Það verða augljóslega breytingar,“ sagði Arnar.