Íranir ráðast á her­stöð Banda­ríkja­manna í Katar

Tansim, ríkismiðill Írana, greinir frá því að Íran hafi hafið „öflugar“ hernaðaraðgerðir í dag til að svara árásum Bandaríkjamanna á kjarnorkuinnviði í Íran aðfaranótt sunnudags. Fjöldi miðla greindi frá því um kl. 17 í dag að sprengingar heyrðust frá himni yfir Dóha, höfuðborg Katar. Al Jazeera skrifaði enn fremur að blossar hefðu sést á himni yfir borginni.

Aðgerðarstjórn Bandaríkjahers rekur herstöð í Katar, nánar til tekið í al-Udeid, sem er suðvestur af Dóha. Katarar lokuðu lofthelgi sinni fyrr í dag þar sem veruleg ógn var talinn á því að Íranir myndu ráðast á herstöðina, að sögn BBC. Stöðin í al-Udeid er ein víggirtasta herstöð Bandaríkjanna í Mið-Austurlöndum.

Axios hefur eftir ónafngreindum ráðamanni í Ísrael að tíu eldflaugum hafi verið skotið í átt að Katar og að minnsta kosti einni í átt að Írak. Sendiráð Bandaríkjanna í Katar biðlaði til Bandaríkjamanna þar í landi að leita skjóls fyrr í dag. Utanríkisráðherra Breta bað samlanda sína í Katar um slíkt hið sama.

Utanríkisráðuneyti Katar hefur fordæmt árás Írana, sagt hana vera brot á fullveldi og landhelgi landsins. „Við í Katarríki áskiljum okkur rétt til þess að svara [...] þessum blygðunarlausu árásum,“ segir Majed al-Ansari, talsmaður utanríkisráðuneytisins, samkvæmt Al Jazeera.

Utanríkisráðuneyti Katar segir enn fremur að loftvarnir landsins hafi skotið írönsku eldflaugarnar niður.

Fréttin hefur verið uppfærð.