Fullt af furðubátum keppa á Flúðum í dag

Furðubátakeppnin er einn af liðum fjölskyldu hátíðarinnar „Flúðir um Versló og hefst klukkan 15:00 í dag á Litlu Laxá. Bergsveinn Theodórsson, eða Bessi hressi eins og hann er oftast kallaður veit allt um keppnina og mun fá þá hlutverk að lýsa keppninni af sinni alkunnu snilld.

„Það er furðubátakeppni þar sem krakkar úr sveitinni eru búin að vera að föndra báta og láta þá svo fljóta niður Litlu Laxá, sem rennur hérna í gegnum Flúðir. Mikill metnaður, mikil hugmyndaauðgi og mjög gaman að fylgjast með því,“ segir Bessi.

Hvers konar bátar eru þetta aðallega?

„Allskyns bátar og það er svona það, sem er að gerast í samfélaginu, sem að svolítið litar þemað. Eitt árið vorum við með voða mikið af kórónuveiru tengdum bátum. Þegar stór fótboltamót eru í gangi þá er það fótboltaþema, sem ræður ríkjum en aðallega er þetta bara ótrúlegt að sjá hvað krökkunum dettur í hug að gera,“ segir Bessi.

Bessi er mjög ánægður með helgina það sem af er á Flúðum.

„Frábær helgi, æðislegir áhorfendur og æðislegir gestir, sem eru búnir að vera hérna hjá okkur alla helgina. Við erum svo stolt og full af þakklæti og við getum bara ekki beðið eftir því að fara að undirbúa Flúðir um versló 2026“, segir Bessi hressi.