Nálgast sam­komu­lag um TikTok

Það er þó eftir að frestur sem Trump hefur veitt á framfylgd laga sem eiga að tryggja sölu TikTok rennur út. Það gerist á miðvikudaginn.

Samkvæmt Bessent myndi samkomulag fela í sér að bandarískir aðilar myndu taka yfir stjórn samfélagsmiðilsins vinsæla í Bandaríkjunum.

Erindrekar Bandaríkjanna og Kína, tveggja stærstu hagkerfa heims, eiga þessa dagana í viðræðum í Madríd á Spáni þar sem þeir eru að ræða viðskiptasamband ríkjanna og í raun að framlengja vopnahlé í viðskiptaátökum ríkjanna. Í þeim átökum hafa ríkin beitt ýmsum vopnum.

Donald Trump, forseti Bandaríkjanna, hefur að mestu leyti notast við tolla og bannað bandarískum fyrirtækjum að selja tilteknar vörur í Kína. Ráðamenn í Kína hafa einnig beitt einhverju skæðast vopni þeirra, sem er að takmarka sölu á sjaldgæfum málmum og afurðum úr þeim til Bandaríkjanna og annarra ríkja.

Fyrr á þessu ári vöruðu forsvarsmenn stórra fyrirtækja víða um heim við umfangsmiklum og slæmum áhrifum á hagkerfi heimsins vegna þessara takmarkana en Kínverjar eru svo gott sem allsráðandi á sviði sjaldgæfra málma.

Sjá einnig: Trump segir sjaldgæfa málma og segla aftur á leið til Bandaríkjanna

Kínverjar hafa einnig hætt að kaupa landbúnaðarvörur frá Bandaríkjunum, sem hefur komið verulega niður á bandarískum bændum.

Hluti af þessum deilum hefur snúið að samfélagsmiðlinum TikTok. Undir lok forsetatíðar Joes Biden, fyrrverandi forseta, samþykktu bandarískir þingmenn, frumvarp sem gerði ByteDance, kínverskum eigendum TikTok, skylt að selja rekstur fyrirtækisins í Bandaríkjunum eða loka því.

Var það gert vegna áhyggja af því að ógn stafi af TikTok vegna þeirra valda sem Kommúnistaflokkur Kína hefur gegn fyrirtækjum þar.

Gefi yfirvöld í Kína fyrirtækjum eins og TikTok skipanir um að afhenda viðkvæmar upplýsingar um notendur eða dreifa áróðri, sé ómögulegt fyrir forsvarsmenn kínverskra fyrirtækja að verða ekki við þeim kröfum.

Trump var upprunalega hlynntur því að banna TikTok í Bandaríkjunum en snerist hugur eftir að bandarískur auðjöfur, sem var fjárfestir í TikTok, heimsótti hann. Sem forseti hefur Trump neitað að framfylgja lögunum og gefið út forsetatilskipanir um að fresta sölunni á meðan viðræður hafa staðið yfir.

Hvort hann hafi yfir höfuð heimild til að gera slíkt, þar sem bandarísk lög segja til um að selja eigi samfélagsmiðilinn, hefur verið óljóst en leiðtogar þingsins, sem eru Repúblikanar, hafa ekki viljað láta reyna á það.

Trump hefur þrisvar sinnum gefið slíkan frest og sá síðasti rennur út á miðvikudaginn.