Hvetur stjórn­völd til að veita ferða­skrif­stofum lán eins og í Covid

„Þetta er misjafnt eftir fyrirtækjum. Við erum aðallega með ferðir þar sem er ekki flogið með Play en við erum bundin við einn áfangastaðinn, sem er Madeira,“ segir Sigurður en Play hóf flug þangað fyrir ári síðan. Sigurður var til viðtals í Bítinu á Bylgjunni í morgun um gjaldþrot Play.

„Við sitjum dálítið í súpunni með það núna að bæði vera með hóp þarna úti núna, sem fór fyrir viku síðan, og svo þrjá hópa fram til áramóta. Hrekkurinn þarna eru mjög strangar reglur sem snúa að ferðaskrifstofum,“ segir Sigurður.

Það eigi að felast öryggi í því að versla við ferðaskrifstofu en það sé á þeirra ábyrgð að greiða öllum til baka. Hann segir ferðaskrifstofurnar meðalstórar í dag og á „unglingsaldri“. Ferðirnar í Madeira séu á vegum Ferðaskrifstofu eldri borgara.

Kynna lausnir í vikunni

Hann segir standa til að tilkynna þessum hópum í vikunni hvaða lausnir séu í boði. Ferðaskrifstofan sé fjársterk og með sjóði til að endurgreiða. Þær lausnir sem séu í boði séu að aflýsa ferðinni og endurgreiða hana, önnur lausn að bjóða inneign og fara seinna, og sú þriðja að fá nýja dagsetningu og ferðaáætlun frá fyrirtækinu.

„En það er ekki svo létt með Madeira. Það er enginn að fljúga þangað,“ segir hann og að hann hafi hvatt Icelandair til að taka við fluginu þangað en félagið hafi ekki sýnt því áhuga.

Sigurður segir að þau muni finna út úr þessu en segir líka að þau hafi farið í gegnum þetta áður í Covid þegar allt skall í lás. Þá hafi töluverður fjöldi verið fastur erlendis og stjórnvöld gripið inn í og aðstoðað ferðaskrifstofur við að koma fólki heim. Ferðamálastofa bauð þá lán til að greiða fyrir það á góðum vöxtum og því hafi verið auðvelt að borga það niður.

„Við erum búin að borga það núna. Það fann í rauninni enginn fyrir þessu.“

Hann segir fyrirtækið eiga kröfu á þrotabúið en hún nái ekki yfir til dæmis hótelgistingu og annað. Flugið sé lítill hluti og fyrirtækið fái ekkert endurgreitt hvað varðar hótelgistinguna.

Hvað varðar tryggingar segir Sigurður aldrei hægt að tryggja ferðaskrifstofu fyrir gjaldþroti flugfélags. Tryggingar snúi að mestu að neytendavernd. Verði ferðaskrifstofa gjaldþrota á meðan fólk er í útlöndum þá geti fólk snúið sér að Ferðamálstofu og krafist endurgreiðslu á kostnaði sem það varð fyrir við að koma sér heim. Hann segir þetta aðeins gilda í þessum aðstæðum en ekki til dæmis ef hótel lokar óvænt áður en fólk kemur. Þá sé það á hans ábyrgð að finna nýtt hótel og greiða fyrir það.

Hann segist vona að gjaldþrot Play verði ekki til þess að minni ferðaskrifstofur leggi upp laupana. Hefði þetta átt sér stað fyrir tveimur árum hefði reksturinn verið erfiður hjá þeim en staða þeirra sé sterk í dag.

Erfitt fyrir minni ferðaskrifstofufyrirtæki

„Ég finn til með þeim sem eru að selja tíu fimmtán ferðir á ári og eru með tvo þriðju undir hjá Play. Ég sé ekki hvernig þeir eiga að gera farið í gegnum þetta,“ segir hann.

Sjá einnig: Arnar Þór og Unnur Lilja skipta búi Play

Ef ríkisstjórnin myndi bjóða upp á sömu lán og í Covid væri staðan önnur.

Tilkynnt var um gjaldþrot Play í fyrradag. Um 400 misstu vinnuna. Greint var frá því í gær að unnið væri að því að færa átta þotur Play yfir til maltneska dótturfélagsins Fly Play Europe, og að stefnt væri að því að hefja starfsemi á ný í síðasta lagi eftir tíu vikur. Kröfuhafar sem tóku þátt í skuldabréfaútboði Play í ágúst geta óskað eftir því að fá maltneska félagið leyst til sín. Boðað hefur verið til kröfuhafafundar mánudaginn 6. október.