Virði gulls í methæðum

Nú í dag gerðist það í fyrsta sinn að virði gulls fór yfir fjögur þúsund dali á únsu vestanhafs, samkvæmt frétt Wall Street Journal.

Fjögur þúsund dalir samsvara um 485 þúsund krónum. Sú únsa sem notuð er yfir gull er 31,1 gramm. Þannig að kíló af gulli er því um 15,6 milljón króna virði, lauslega reiknað.

Hækkunin á árinu er meiri en hún var í kringum hrunið 2008 en samkvæmt frétt WSJ hefur gull ekki hækkað svo hratt í virði síðan 1979, þegar verðbólga hækkaði gífurlega og olíukrísan svokallaða átti sér stað.

Miðillinn segir að hækkunina megi að miklu leyti rekja til ótta fjárfesta við umfangsmiklar aðgerðir Trumps á sviði alþjóðaviðskipta. Er þá vísað til tolla sem hann hefur beitt og viðskiptadeilna við ríki eins og Kína. Einnig er vísað til þess þrýstings sem hann hefur beitt á stjórnendur Seðlabanka Bandaríkjanna um að lækka vexti.

Því til stuðnings er bent á að fyrri hluti þessa árs var sá versti sem Bandaríkjadalurinn hefur átt í rúma fimm áratugi.

Óvissa alls staðar

Slegið er á svipaða strengi í frétt New York Times en þar er bent á að virði dalarins hafi lækkað um tíu prósent á árinu. Skuldir bandaríska ríkisins hafi aukist gífurlega og missti ríkissjóður Bandaríkjanna efstu lánshæfiseinkunn greiningastofnana og fyrirtækja eins og Moody‘s fyrr á árinu.

Einn ráðgjafi sem rætt var við sagði að mikil óvissa útskýrði ástandið að mestu. Finna mætti óvissu á hinum ýmsu sviðum í heiminum, hvort sem þau sneru að pólitík eða hagstjórn.

Ekki er búist við því að ástandið muni skána í bráð en greinendur Goldman Sachs breyttu spám sínum um verð gulls í gær. Nú búast þeir við því að verðið muni ná 4.900 dölum fyrir lok næsta árs.

Seðlabankar víða um heim hafa á undanförnum árum fjárfest mikið í gulli og á það sérstaklega við banka í ríkjum sem eiga ekki í góðu pólitísku sambandi við hin svokölluðu Vesturlönd, samkvæmt WSJ.

Þessi kaup jukust töluvert eftir innrás Rússa í Úkraínu 2022 og eftir að Rússar voru beittir umfangsmiklum refsiaðgerðum vegna hennar.