Ó­trú­legt að bankarnir hafi komist upp með að „loka sjoppunni“

Eftir dóm hæstaréttar um að tilteknir lánaskilmálar Íslandsbanka væru ólöglegir brugðu stóru viðskiptabankarnir á það ráð að gera hlé á nýjum lánveitingum en á síðustu dögum hafa þeir verið að sýna á spilin, síðast Arion banki í gær.

„Það er gott að bankarnir séu loksins farnir að sýna á spilin og farnir að lána aftur en það er náttúrulega ótrúlegt að þeir hafi bara komist upp með það að loka sjoppunni, ef svo má að orði komast, svo vikum skiptir en það er áhugavert að sjá að þeir eru með mismunandi útgáfur af lánum til neytenda.“

Bankarnir bjóða allir ólík lán, Landsbankinn býður til að mynda aðeins fyrstu kaupendum upp á verðtryggð lán. Bankarnir fylgja þó hlutlægum viðmiðum en ekki huglægum.

Breki var spurður hvort hann hefði órað fyrir þessum viðbrögðum bankanna þegar samtökin lögðu upp í þennan leiðangur fyrir dómstólum.

Alvarlegt að loka hafi þurft fyrir útlán

„Það sem kom mér kannski mest á óvart var hversu óundirbúnir bankarnir voru. Nú eru meira en fjögur ár síðan við stefndum þeim og meira en eitt og hálft ár síðan EFTA-dómstóllinn kvað upp mjög skilmerkilegan og skýran dóm um að huglæg viðmið við vaxtabreytingar væru ólögleg. Það að þetta hafi komið bönkunum þannig í opna skjöldu að þeir hafi þurft að loka fyrir útlán er náttúrulega stórundarlegt og í raun alvarlegt að sú staða hafi komið upp. Fjöldi fólks sat uppi með lánsloforð en svo var allt í einu skrúfað fyrir lánveitingar. Það er það sem kom mér kannski mest á óvart í þessu máli.“

Finnst ekki hugsað nægilega um viðskiptavini

Honum finnst viðbrögð bankanna hafa verið eilítið sjálfhverf. Ekki sé verið að hugsa um lántakendur.

„Þeir hefðu alveg mátt taka betur utan um sína viðskiptavini finnst mér. Þess ber að geta að bönkunum gengur vel. Hagnaðaraukning þeirra milli ára er gífurleg og vaxtamunur þeirra er meiri en gengur og gerist í Evrópu og tvöfalt meiri en gengur og gerist á Norðurlöndunum þannig að það er borð fyrir báru fyrir þá að lækka vexti á húsnæðismarkaði.“