Sagan ekki sönn: „Veit ekki hvaðan þetta á að hafa komið“

Keflvíkingar voru orðaðir við Arnór Ingva og Elías Má í vetur eftir að liðið tryggði sæti sitt í Bestu deild karla í fyrsta sinn um hríð. Mikið kapp yrði lagt á að fá þá félaga heim í Keflavík en báðir léku með liðinu á yngri árum.

Báðir munu spila í Bestu deildinni í sumar en hvorugur með Keflavík. Elías Már, sem lék í Kína í ár, samdi við Víking en Arnór Ingvi fór frá Norrköping í Svíþjóð til KR um helgina.

Þessi saga af þeim félögum var borin undir Arnór Ingva í viðtali í dag.

„Nei. Ég hef ekkert rætt við hann Elías. Hann er góður drengur en við ræddum ekki saman um eitt eða neitt. Ég veit ekki hvaðan þetta á að hafa komið,“ segir Arnór Ingvi léttur.

„Ég ræddi við Halla (Harald Frey Guðmundsson, þjálfara Keflavíkur) í símann einu sinni fyrir löngu síðan, bæði sem vin enda kunningi minn sem ég spilaði með þegar ég var yngri. Hann var bara að heyra í mér hljóðið og meira var það ekki. Ég hef aldrei heyrt aftur í þeim,“

„Ég veit ekki alveg hvaðan Keflavík kom, kannski af ég var þar þá. En það var ekkert meira en það,“ segir Arnór Ingvi.

Nánar verður rætt við Arnór Ingva í Sportpakkanum á Sýn í kvöld.