Minningarleikur um strákinn sem lést í bíl­slysi á Miklu­braut: „Fyllum höllina - fyrir Patta“

Hinn sautján ára gamli Patrekur Freyr Sveinsson lést í slysinu en hann var farþegi í bílnum sem hafnaði á stólpa Vegagerðarinnar til móts við hús Hjálpræðishersins. Slysið varð rétt eftir klukkan ellefu um kvöldið en ökumaðurinn, piltur á sama aldri, slasaðist töluvert.

Fyrirhugaður leikur karlaliða SR og Fjölnis í Egilshöll næsta þriðjudag verður nú spilaður á heimavelli Patta í Laugardalnum klukkan 19:45. Reykjavíkurliðin tvö hafa ákveðið að allur ágóði af miðasölu þessa leiks renni óskiptur til fjölskyldu hans, svo hún þurfi, í sinni ólýsanlegu sorg, að hafa minni áhyggjur af kostnaði vegna andláts sonar síns.

Foreldrafélag SR ætlar að leggja málefninu lið og gefur allan ágóða af veitingasölu á leiknum. Einnig verður glæsilegur kökubasar á leiknum þar sem hægt verður að kaupa bakkelsi til styrktar fjölskyldunni.

Hér fyrir neðan má sjá styrktarreikning þeirra sem er opinn fyrir frjálsum framlögum. Margt smátt gerir eitt stórt. 

0511-14-077086, kt. 150886-3419

„Þrátt fyrir að við séum harmi slegin og hjörtu okkar allra brostin vegna fráfalls Patreks þá erum við ákveðin í því að halda minningu hans á lofti,“ segir á samfélagsmiðlum Skautafélags Reykjavíkur. Þar kemur fram að íshokkísamfélagið á Íslandi sé ekki fjölmennt en það er þétt og á stundum sem þessum standa þau saman öll sem eitt.

„Patrekur eða Patti, eins og hann var jafnan kallaður, var hvers manns hugljúfi; frábær vinur og góður liðsfélagi. Hann hafði mikinn metnað fyrir íshokkííþróttinni og stefndi heilshugar að því að verða valinn í landslið Íslands. Með sínum einstaka karakter og ljúfmennsku snerti hann hjörtu okkar allra. Hans er og verður sárt saknað en minning hans mun lifa í hjörtum SR-fjölskyldunnar um ókomna tíð. Hann var einn af okkur,“ segir á miðlum SR.

„Hugur allra, þar á meðal okkar á Vísi, er hjá fjölskyldu Patta, Ásgerði, Svenna, Kristófer Mána og Ronju Líf, á þessum erfiðu tímum. Við vottum fjölskyldunni okkar dýpstu samúð,“ segir á miðlum SR.