Í­huga að fresta út­gáfu PS6 um allt að tvö ár

Áður stóð til að gefa PS6 út í lok næsta árs, 2027.

Þetta kemur fram í frétt Bloomberg en þar segir einnig að fyrirtæki sem framleiði tölvuflögur haldi ekki í við eftirspurn frá gervigreindarfyrirtækjum sem reisa nú gagnaver eins hratt og hægt er að slá þeim upp.

Bloomberg segir að forsvarsmenn Nintendo séu að íhuga að hækka verðið á Switch 2 leikjatölvum þeirra, vegna hærri kostnaðar íhluta eins og vinnsluminnis. Sony er þegar búið að hækka verð á leikjatölvum og búnaði.

Sjá einnig: Eina leiðin til að spila, ef þú tímir því

PlaysStation 5 var fyrst sett á markað árið 2020 og PS4 árið 2013, sem kom út sjö árum á eftir PS3. Hins vegar voru sex ár á milli PS3 og PS2 og fimm ár milli annarrar tölvunnar og þeirrar fyrstu.

Að fresta útgáfu nýrrar leikjatölvu væri, samkvæmt frétt Forbes, fordæmalaust fyrir Sony. Þar segir þó einnig að í rauninni sé ekki mikil eftirspurn eftir nýrri kynslóð PlayStation. Eldri tölvurnar, og sérstaklega PS5 Pro útgáfan, beri sig enn vel og spilarar hafi ekki verið að kalla af miklum krafti eftir nýrri tölvu.

Í fljótu bragði má færa rök fyrir því að frestun útgáfu nýrrar kynslóðar PlayStation þjóni hagsmunum Sony og jafnvel spilara líka.

Leikir taka einnig mun lengri tíma í framleiðslu en þeir gerðu áður en það að gera hefðbundinn AAA leik tekur iðulega allt frá fjórum til sjö árum. Svo er auðvitað Grand Theft Auto 6, sem hefur tekið mun lengri tíma en það. GTA 5 kom út árið 2013, á PlayStation 3.

Sjá einnig: Fresta GTA 6 aftur og um hálft ár

Þá hefur einnig dregið úr tæknilega stökkinu milli kynslóða leikjatölva, með tilliti til grafíkur og reiknigetu.