Fresta á­kvörðun um hugsan­legt bann á Trump

Stofnunin ýtti þar með hugsanlegum ágreiningi við Donald Trump forseta og aðra bandaríska embættismenn fram yfir heimsmeistaramótið í fótbolta í sumar.

Framkvæmdastjórn WADA fundaði og sagðist myndu íhuga nýju regluna í september, tveimur mánuðum eftir lok heimsmeistaramótsins sem Bandaríkin halda ásamt Kanada og Mexíkó.

Ef slík regla verður samþykkt síðar á þessu ári myndi hún væntanlega taka gildi fyrir Ólympíuleikana í Los Angeles árið 2028.

Hafa ekki borgað árgjaldið síðan 2023

Bandaríkin hafa ekki greitt árgjöld sín síðan 2023. Ef það heldur áfram gæti nýja reglan sett Trump og bandaríska þingmenn á bannlista fyrir leika í eigin landi, þótt efasemdir séu um hvort lyfjaeftirlitsstofnun gæti komið í veg fyrir að nokkur þeirra sæki Ólympíuleikana.

Ágreiningur við WADA hefur ekki verið sérstaklega flokkspólitískt mál í Bandaríkjunum, sem héldu eftir greiðslum árin 2024 og 2025 – einu sinni á forsetatíð Trumps og einu sinni á forsetatíð Joe Biden.

Bandaríkin hafa haldið eftir 7,3 milljónum dala á þessum tveimur árum til að mótmæla meðferð WADA á máli sem varðar kínverska sundmenn og önnur mál. Það jafngildir um 940 milljónum íslenskra króna.

Hefur bein áhrif á starfsemi

Eftir fundinn á þriðjudag sagði Olivier Niggli, framkvæmdastjóri WADA, að „það að ríkisstjórnir haldi eftir framlögum af pólitískum eða öðrum sjálfviljugum ástæðum er enn alvarlegt áhyggjuefni fyrir alla hagsmunaaðila WADA.“

„Óstöðugleiki í fjármögnun hefur bein áhrif á starfsemi og þróun alþjóðalyfjaeftirlitsáætlunarinnar. Að lokum eru það íþróttamenn um allan heim sem verða fyrir mestum og neikvæðustum áhrifum,“ sagði Niggli.

WADA hóf að kanna málið árið 2020, um það leyti sem Bandaríkin fóru að hóta að halda eftir peningum, en stofnunin segir að málið um að refsa ríkisstjórnum fyrir að greiða ekki sé ekki beintengt Bandaríkjunum.