Leggur hundrað prósenta toll á einkaleyfisvarin lyf

Í tilkynningu frá Hvíta húsinu segir að markmið tollanna sé að stuðla að þjóðaröryggi, sem felist í því að sem flest lyf séu framleidd innanlands. 

Nokkrir af stærstu lyfjaframleiðendum heims undirrituðu samning við Bandaríkjastjórn í fyrra sem fól í sér að lyf að verðmæti margra milljarða Bandaríkjadala yrðu undanþegin tollum næsta árið. Þá hafa samheitalyf einnig verið undanþegin tollum, að því er kemur fram í umfjöllun Reuters. 

Þá eru lyf við sjaldgæfum sjúkdómum og dýralyf undanþegin tollunum ef þau koma frá löndum í viðskiptasambandi við Bandaríkin eða uppfylla brýnar lýðheilsuþarfir. 

Tollarnir munu því helst bitna á litlum og meðalstórum framleiðendum nema þeir semji við bandarísk stjórnvöld um verðlag eða flytji framleiðsluna til Bandaríkjanna. Fram kemur í frétt BBC að aðgerðin hafi því helst táknrænt gildi, sér í lagi vegna þess að meginþorri lyfja sem er neytt í Bandaríkjunum eru samheitalyf. 

Fyrirtæki sem skuldbinda sig til að flytja lyfjaframleiðslu sína til Bandaríkjanna fyrir lok kjörtímabils Trump, í janúar 2029, sæta áfram 20 prósenta tolli á innflutt lyf. Takist framleiðendum að gera verðlagningarsamning við stjórnvöld fellur tollurinn alveg niður. 

Hingað til hafa slíkir samningar falið í sér að fyrirtækin selji sjúkratryggingum lyfin á sambærilegu verði og sams konar lyf á erlendum mörkuðum. Trump hefur að undanförnu beitt lyfjaframleiðendur þrýstingi vegna kostnaðar á lyfjum. Samkvæmt umfjöllun Guardian borga bandarískir sjúklingar oft næstum þrefalt meira fyrir lyfseðilsskyld lyf en í öðrum þróuðum löndum. 

Stórum fyrirtækjum er gefinn 120 daga frestur til að gera viðeigandi ráðstafanir til að komast hjá tollunum og minni fyrirtæki fá 180 daga frest til að semja við bandarísk stjórnvöld.