„Gríðar­lega stolt af þessu af­reki og gaman að eiga þetta á feril­skránni“

„Fyrirfram bjóst ég ekki við að ganga út af vellinum og vera svekkt að hafa ekki unnið“ sagði Glódís Perla Viggósdóttir fyrirliði Íslands eftir leikinn í dag.

„Mér fannst við bara eiga virkilega góðan seinni hálfleik og mér fannst fyrri hálfleikurinn að mörgu leyti góður líka, við vörðumst vel og þær fengu ekki mikið af færum“

„Ég er eiginlega bara svekkt að við höfum ekki skorað einhver mörk í seinni hálfleik“

Það var mikill munur á hálfleikum hjá Íslenska liðinu í dag en þær mættu mun grimmari til leiks þann síðari.

„Við töluðum aðallega um að kannski hætta að reyna of flækja hlutina og þegar við vinnum boltann að koma honum bara upp í hornin og fá hlaup á bakvið og reyna fá þá innköst, horn og við fáum bara ofboðslega mikið sjálfstraust með því“

„Þannig byrjum við seinni hálfleikinn og það bara byggir ofan á sig og bara gríðarlega ánægð með það hvernig við nýttum okkur orkuna“

Íslenska liðið fékk hörku færi í seinni hálfleiknum en boltinn vildi bara ekki fara inn.

„Gríðarlega svekkjandi, við sköpuðum okkur nóg til þess að vinna England í dag og það er pínu leiðinlegt“

Það mátti minnstu muna að Íslenska liðið hefði náð í úrslit í dag en hvar lá helsti munurinn á milli liðana?

„Kannski svolítið öðruvísi fótbolti. Við kannski erum meira að skapa úr föstum leikatriðum og skyndisóknum og þær eru kannski að spila meira og í fyrri hálfleik ná þær aðeins að pinna okkur niður og við komumst ekki alveg út úr lág blokkinni okkar“

„Ég er bara gríðarlega stolt af stelpunum okkar og hvernig við komum inn í seinni hálfleikinn og hvernig við tökum yfir leikinn“

Það var vel mætt í stúkunni í dag en rúmlega fjögur þúsund voru mætt á Laugardalsvöll í dag.

„Virkilega gaman og þýddi ótrúlega mikið fyrir mig. Þetta var stór leikur fyrir mig þannig það var ótrúlega gaman að það voru svona margir sem komu og vildu vera partur af deginum og auðvitað gefur þetta okkur ótrúlega mikla orku“

Glódís Perla Viggósdóttir spilaði sinn 146. landsleik í dag og varð um leið sú leikjahæsta frá upphafi fyrir A-landslið Íslands.

„Gríðarlega stolt fyrst og fremst. Þetta er alveg galin tala þegar maður pælir í því og þegar maður fer aðeins að leiða hugann að því hversu lengi ég er búin að vera hérna og hvað er búið að gerast“

„Þetta er svo skrítið á sama tíma því mér finnst ég eiga svo mikið eftir en ég er bara gríðarlega stolt af þessu afreki og gaman að eiga þetta á ferilskránni“

Glódís Perla er náttúrulega á besta aldri svo hún mun bara bæta í metið.

„Já vonandi þá tikka fleiri í kassann“ sagði Glódís Perla Viggósdóttir stolt.