„Mamma mín var skotin í Karli, trúið þið því?“

Í upphafi ávarps síns talaði Trump fallega um samskipti Bandaríkjanna og Bretlands. Þó að hann hafi sjálfur ítrekað verið mjög gagnrýninn á Bretland á undanförnum vikum, sagðist Trump sannfærður um að gott samband ríkjanna myndi vara um ókomna framtíð.

Þá lofaði hann Elísabetu drottningu sem dó árið 2022.

Trump sagðist þakklátur fyrir að hafa kynnst henni og talaði um tréð sem hún gróðursetti fyrir utan Hvíta húsið á árum áður. Tréð væri ekki ósvipað bandarísku þjóðinni að því leyti að henni hefði verið sáð með breskum höndum í bandarískri jörðu.

Þá talaði Trump einnig fallega um Karl sjálfan og vék orðum sínum einnig að móður sinni, sem fæddist í Skotlandi. Forsetinn sagði að hún hefði verið mjög hrifin af bresku konungsfjölskyldunni og sérstaklega Elísabetu.

Þá hefði hún verið sérstaklega hrifin af ungum Karli. Hann hefði verið svo sætur.

„Móðir mín var skotin í Karli, trúið þið því?“

Karl mun svo seinna í dag ávarpa báðar deildir bandaríska þingsins, fyrstur breskra konunga eða drottninga. Með því að spóla aftur í spilaranum má finna ávarp Trumps.