Geta unnið 22. leikinn í röð: „Þetta verður stál í stál“

Valur vann fyrsta leikinn gegn ÍBV á Hlíðarenda, 39-33. Eyjakonur voru tveimur mörkum yfir í hálfleik, 18-20, og náðu mest sex marka forskoti í seinni hálfleik, 19-25. En Valskonur voru mun sterkari á lokakafla leiksins og skoruðu sex af síðustu sjö mörkum leiksins.

Valsliðið kom til Eyja rétt fyrir miðnætti í gær og að sögn þjálfarans Antons Rúnarssonar gekk siglingin vel. Hann kvaðst nokkuð sáttur með frammistöðu Vals í fyrsta leiknum gegn ÍBV en segir að liðið geti gert betur en þá.

„Við skoruðum auðvitað 39 mörk í þessum leik en það er alveg klárt mál að við þurfum að gera betur á nokkrum sviðum, meðal annars í sókn og líka í vörn eins og alltaf en auðvitað var bara sterkt að ná að klára þetta,“ sagði Anton í samtali við Vísi í dag.

„Ég býst bara við hörkuleik. Við erum auðvitað komnar til Eyja, á erfiðan útivöll og erum í úrslitaeinvíginu og úrslitakeppni þannig að þetta verður stál í stál og ekki við neinu öðru að búast.“

ÍBV lenti í 2. sæti Olís-deildarinnar á eftir Val og sló Hauka út í hörkueinvígi í undanúrslitunum, 3-2. Anton segir Eyjaliðið sterkt og Valsliðið þurfi að vera tilbúið í baráttu kvöldsins.

„Það er að mörgu að huga. Þetta eru frábærir leikmenn og leikmenn sem geta skorað upp úr engu og fleira. Þannig að við þurfum að vera klárar í alls konar augnablik í leiknum og fleira. Við erum búin að fara yfir hlutina og það er margt sem við hefðum getað gert betur í síðasta leik sem gengur vonandi upp í dag,“ sagði Anton.

Valur vann síðustu tvo leiki sína á árinu 2025 og hefur unnið alla nítján leiki sína í öllum keppnum á þessu ári. Anton er að vonum ánægður með hvernig gengið hefur undanfarna mánuði.

„Já, ekki spurning. Við höfum náð að halda fínum takti í þessu og það eru margar sem hafa stigið upp, bæði yngri og eldri leikmenn, og vonandi heldur það bara áfram,“ sagði Anton.

Með sigri í leiknum í kvöld getur Valur tryggt sér Íslandsmeistaratitilinn á heimavelli á laugardaginn kemur. Anton fer þó ekkert fram úr sér í þessum efnum.

„Við tökum auðvitað bara einn leik fyrir í einu. Við þurfum að eiga toppframmistöðu til að ná í sigur og við ætlum okkur að sjálfsögðu að gera það. Við þurfum að spila hörkuvörn áfram og vera skynsamar og agaðar í okkar sóknarleik og finna réttu augnablikin til að komast í þessi færi sem við viljum fá,“ sagði Anton að lokum.

Leikur ÍBV og Vals hefst klukkan 18:00 í kvöld og verður í beinni textalýsingu á Vísi.