Spá 0,25 prósentu­stiga hækkun stýrivaxta

Þar segir að verðbólga sé enn yfir markmiði og verðbólguvæntingar hafi reynst þrálátar. Að mati deildarinnar muni það ráða mestu um að nefndin haldi áfram vaxtahækkunarferlinu sem hófst í mars. Peningastefnunefnd Seðlabankans kemur saman í næstu viku og kynnir vaxtaákvörðun miðvikudaginn 20. maí. Nefndin hækkaði vexti um 0,25 prósentustig við síðustu ákvörðun og standa meginvextir bankans nú í 7,5%.

„Þá var gefið sterklega í skyn að hækkunarferlið sem hófst í mars þyrfti að halda áfram og við spáum því að nefndin hækki vexti á ný í maí, um 0,25 prósentustig. Verðbólga lækkaði úr 5,4% í 5,2% í apríl og mældist almennt undir væntingum. Verðbólga er því sú sama og þegar nefndin hittist síðast og raunstýrivextir nokkurn veginn þeir sömu miðað við liðna verðbólgu. Nefndin tók skýrt fram við síðustu ákvörðun að hún væri tilbúin að herða taumhaldið enn frekar og teljum við því líklegt að svo verði.“

Verðbólga hjaðnað ef ekki væri fyrir bensínið

Þá segir í tilkynningunni á vef bankans að ef rýnt sé í framlag ólíkra liða sjáist að þrátt fyrir að verðbólga hafi staðið í stað frá síðasta fundi peningastefnunefndar hafi framlag flestra liða til verðbólgu dregist saman frá síðasta fundi nefndarinnar.

„Bensín og aðrar innfluttar vörur vega 0,62 prósenstustig til hækkunar verðbólgu á milli funda, meðan allir aðrir liðir til samans vega nánast jafn mikið til lækkunar. Að öðru óbreyttu hefði verðbólga því mælst 4,6 prósent ef bensín og aðrar innfluttar vörur hefðu ekki hækkað.“

Nefndin geti haft áhrif á væntingar

Greiningardeild Landsbankans segir að vissulega hafi stýrivaxtahækkanir á Íslandi ekki áhrif á heimsmarkaðsverð á bensíni. Þær geti þó haft áhrif á verðbólguvæntingar, sem dragi úr verðbólguþrýstingi. Verðbólguvæntingar skipti miklu máli, meðal annars þegar kemur að stöðunni á vinnumarkaði. Ef heimilin geri ráð fyrir meiri verðbólgu geti það haft áhrif á launakröfur þeirra. Á sama hátt geti væntingar fyrirtækja um hærri launakostnað haft áhrif á verðlagningu þeirra. Þannig geti verðbólga orðið þrálátari og viðvarandi.

„Ekki hefur tekist að ná niður verðbólguvæntingum. Þvert á móti hafa þær hækkað nokkuð síðan í desember, samhliða aukinni verðbólgu. Við slíkar aðstæður verður erfitt að líta framhjá tímabundnum verðhækkunum sem koma erlendis frá. Það skýrir að okkar mati hvers vegna nefndin hækkaði vexti í mars og er ástæða þess að við teljum líklegt að hún hækki vexti aftur í næstu viku.“