„Við réðum ekkert við þá“

Jóhannes Karl sá nokkra jákvæða punkta í fyrri hálfleiknum en gæði Víkingsliðsins var hans mönnum ofviða.

„Við áttum nokkrar ágætis stöður í fyrri hálfleik og sköpuðum okkur smá, náðum að spila í gegnum fyrstu pressuna hjá þeim og bjuggum til ágætis stöður sérstaklega úti hægra megin hjá okkur þar sem Gils og Arngrímur voru að komast í ágætis stöður. Við fengum tvö til þrjú færi í fyrri hálfleik og þeir refsuðu okkur með gríðarlegum gæðum. Aukaspyrna hjá Gylfa, skot hjá Gylfa, erfitt fyrir okkur að eiga við þessar fyrirgjafir frá þeim þar sem þeir manna teiginn gríðarlega vel. Tvö núll kannski sanngjörn staða í hálfleik en við hefðum alveg kannski getað skorað eitt mark, ég veit það ekki.“

Síðari hálfleikurinn var mun strembnari fyrir gestina.

„En svo að missa mann snemma í síðari hálfleik og svo setja þeir fljótlega þriðja markið, þetta var bara orðið virkilega erfitt. Svo ganga Víkingarnir bara á lagið og hörku góðir að halda boltanum og velja sér augnablik til þess að spila í gegnum okkur og út fyrir okkur og taka hlaup aftur fyrir okkur. Við réðum ekkert við þá í seinni hálfleik og við réðum ekkert við þá tíu á móti ellefu.“

Sverrir Páll fékk rautt spjald 

Sverri Páll Hjaltested fékk rautt spjald snemma í síðari hálfleik fyrir glæfralega tæklingu aftan frá aftarlega á vellinum. Vilhjálmur Alvar Þórarinsson, dómari, var ekki lengi að lyfta rauða spjaldinu upp eftir tæklingu Sverris Páls. En hvað fannst Jóhannesi Karli um atvikið?

„Ég veit það ekki, verð að treysta dómara leiksins fyrir því. Mér fannst enginn vera að biðja um það. Ég ætla ekki að vera tjá mig um þetta rauða spjald, dómari leiksins hlýtur bara að hafa rétt fyrir sér í því.“

Enn án sigurs 

FH eru enn án sigurs, með tvö stig í næst neðsta sæti deildarinnar, fjórum stigum á eftir Þór, þegar átta umferðum er lokið. Aðspurður hvernig FH-ingar ætli sér að spyrna sér frá botninum, þá hafði Jóhannes Karl þetta að segja.

„Við höldum áfram að leggja okkur fram. Við höldum áfram að reyna að vera samheldnara og þéttara lið. Við höfum alveg talað um það áður að í svona mótlæti og erfiðleikum þá kemur í ljós úr hverju menn eru gerðir. Það er alveg nokkuð ljóst að við þurfum að standa saman og vera þéttir sem leikmannahópur og allt teymið í kringum liðið. Það er vika í næsta leik í Krikanum á móti Skagamönnum. Við verðum að skilja þetta eftir hérna og taka með okkur það jákvæða. Við verðum fyrst og fremst að standa saman,“ sagði Jóhannes Karl að lokum.