Gervigreindargjöf til lýð­ræðisins

Um er að ræða vefinn jaedanei.is. Að óbreyttu ganga Íslendingar að kjörborðinu þann 29. ágúst þar sem svara á þeirri spurningu hvort halda eigi áfram aðildarviðræðum við Evrópusambandið. 

Í tilkynningu frá Reon segir að vefurinn hafi verið hannaður til að styðja kjósendur við að afla sér upplýsinga og mynda sér skoðun byggða á staðreyndum. Gervigreindarvefurinn sé sjálfstæður og óháður, svari spurningum á íslensku, ensku og pólsku, byggi á alvöru heimildum frá báðum hliðum umræðunnar ásamt opinberum frumheimildum.

Á vefnum má finna algengar spurningar og spjallmenni sem útskýrir bæði grunnatriði og umdeildari álitaefni tengd kosningunni.

„Markmiðið er ekki að segja fólki hvað það eigi að kjósa heldur að gera upplýsingarnar aðgengilegri,“ segir Elvar Þormar, eigandi Reon, í tilkynningu.

„Umræðan um ESB-aðild er flókin og oft mjög tilfinningaþrungin. Við vildum búa til verkfæri sem hjálpar fólki að nálgast heimildirnar sjálfar og mynda sína eigin skoðun á þessu málefni.“

Heimildasafn vefsins inniheldur meðal annars efni frá Hagfræðistofnun Háskóla Íslands,

Landskjörstjórn, Stjórnarráðinu, Feneyjanefnd Evrópuráðsins, Evrópuhreyfingunni, Heimssýn og fleiri aðilum úr báðum fylkingum umræðunnar. Sérstök áhersla hefur verið lögð á áreiðanleika svara og stuðning við íslensku.

„Nú er engin afsökun til að taka ekki upplýsta og meðvitaða ákvörðun þann 29. ágúst byggða á staðreyndum en ekki tilfinningum,“ segir Díana Dögg Víglundsdóttir, sölustjóri hjá Reon. 

„jaedanei.is er gjöf Reon til lýðræðisins. Við vildum sýna hvernig hægt er að nota gervigreind til að auka gagnsæi og einfalda upplýsingamiðlun á flóknu efni.“

Vefurinn er ókeypis í notkun, án auglýsinga og án persónurakninga. Verkefnið er þróað og fjármagnað af Reon án utanaðkomandi styrkja. Reon er íslenskt hugbúnaðarfyrirtæki sem býr til tækni með tilgang og sérhæfir sig í stafrænni vöruþróun og lausnum fyrir íslensk og erlend fyrirtæki.