Hetjunni haldið í yfir­heyrslu í sjö tíma við komuna á HM

Hussein var á endanum hleypt inn í Bandaríkin og það er eins gott því um er að ræða hetjuna sem skaut Írak inn á HM með sigurmarki gegn Bólivíu í umspilsleik 1. apríl.

Samkvæmt talsmanni íraska landsliðsins var sími hans tekinn og skoðaður þegar hópurinn lenti í Bandaríkjunum.

„Talal Salah, ljósmyndara landsliðsins, var haldið í 10 klukkutíma og síminn hans sömuleiðis skoðaður, og honum var á endanum meinað að koma til Bandaríkjanna,“ sagði talsmaðurinn.

Hópur stuðningsmanna tók á móti íraska hópnum á flugvellinum en Írak verður nú með á HM í fyrsta sinn í 40 ár, eða frá því að liðið var með í fyrsta sinn á HM í Mexíkó 1986.

Írak er í afar erfiðum riðli á mótinu, I-riðli, og spilar þar við Frakkland, Senegal og Noreg. Fyrsti leikur liðsins er við Erling Haaland og félaga í norska liðinu þann 16. júní, klukkan 22 að íslenskum tíma.