Mikil eftir­vænting vegna endur­komu Ingebrigtsen

Norski hlauparinn Jakob Ingebrigtsen hefur unnið gull í bæði 5000 metra og 1500 metra hlaupi á síðustu þremur Evrópumeistaramótum. Hann hefur þó ekkert hlaupið síðan á heimsmeistaramótinu í frjálsum í fyrra en það gekk ekki jafn vel og hann vonaðist til.

Í viðtali við NRK segist hann vera líkamlega betri nú en þegar hann keppti síðast en hásinin hefur angrað hann í mörg ár. Ingebrigtsen ætlar að láta duga í ár að taka bara þátt í 5000 metra hlaupinu sem er meiri styrkleiki hans.

Norðmaðurinn var ekki heill heilsu í hásininni þegar hann keppti síðast og versnuðu meiðslin töluvert sem er ástæðan fyrir því að hann er búinn að vera frá keppni svona lengi. Hann segist þó vera heill heilsu núna þrátt fyrir að sumir telji skynsamlegra að bíða aðeins lengur.

Jakob Ingebrigtsen hefur fengið gullverðlaun á Ólympíuleikunum fyrir bæði 1500 metra hlaup og 5000 metra hlaup. Hann hefur einnig fengið gull á HM í tvígang.

Evrópumótið hefst í kvöld og stendur yfir til 16. ágúst í Birmingham á Englandi.