Hand­tekinn fyrir að skrifa falsfrétt

Ekkert reyndist hins vegar vera til í því að þýski landsliðsmaðurinn Jamal Musiala hjá Bayern München væri á leið til tyrkneska félagsins. Tyrkneskir fótboltaáhugamenn eru afar blóðheitir og þetta eru viðkvæmir tímar þegar margir leikmenn eru orðaðir við lið þeirra í aðdraganda tímabilsins.

Nú virðist einn fréttamannanna sem skrifa um stórlið Galatasaray hafa lagt saman tvo og tvo og fengið út fimm. Þessi falsfrétt hafði líka afleiðingar fyrir fréttamanninn.

Can Terzi var handtekinn að fyrirskipun saksóknaraembættisins í Bakırköy vegna ákæru um að „dreifa villandi upplýsingum opinberlega“ eftir fréttaflutning hans af því að Jamal Musiala væri á leið til Galatasaray.

Rannsókn var hafin á hendur Terzi eftir að Galatasaray sendi frá sér yfirlýsingu þar sem félagaskiptafréttunum hans var vísað til föðurhúsanna. Galatasaray neitaði meira að segja fullyrðingunni opinberlega í tvígang.

Terzi var síðar sleppt sama dag og hefur hann gefið út yfirlýsingu þar sem hann útskýrir hvaðan hann fékk fréttirnar. Heimildarmaður hans, Hazar Büyüka, skýrði síðar frá því á X að hann hefði komið upplýsingum um félagaskiptin til Terzi en misst sig í því hversu afdráttarlausar þær voru.

„Undir áhrifum frá fréttum sem áður höfðu komið fram opinberlega, trúði ég því í einlægni að félagaskiptin gætu átt sér stað. Þegar ég kom þessari skoðun á framfæri missti ég mig um stund og setti fram ákveðin atriði – upplýsingum sem ég hafði ekki persónulega staðfest að væru réttar – með of afdráttarlausum hætti. Það var ekki ætlun mín að villa vísvitandi um fyrir neinum eða dreifa upplýsingum sem ég vissi að væru í andstöðu við sannleikann,“ skrifaði Büyüka.