„Í raun og veru ætti ég ekki að þola hann“

„Í raun og veru ætti ég ekki að þola hann því hann er persónulega búinn að koma í veg fyrir að mínir titlar séu fjórir en ekki tveir,“ sagði Arnar hreinskilinn á blaðamannafundi í dag.

„Hann var „pain in the ass“ þegar hann var með Blikunum. Í minningunni var hann alltaf virkilega öflugur og vantaði kannski bara smá sjálfstraust, ég veit ekki hvort það er rétta orðið, eða spark í rassinn til að sjá að hann ætti heima á þessu leveli.

Svo kom hann með til Japans og maður sá að hann er virkilega flottur á æfingum. Flottur að taka taktískum leiðbeiningum og flottur strákur í heildina,“ sagði Arnar sem valdi Ísak með í vináttulandsleik í Japan snemma í sumar.

Ísak er nú framherji Lyngby í dönsku úrvalsdeildinni og átti sinn þátt í að koma liðinu þangað úr 1. deildinni, eftir að hafa áður verið hjá Rosenborg en gengið illa að festa sig í sessi þar.

„Svo byrjaði hann að spila í dönsku úrvalsdeildinni, sem er mjög sterk deild, og það sýnir á hvaða leveli menn geta spilað á. Ég held að þakið hans sé hærra en hann gerir sér grein fyrir sjálfur. Vonandi, með því að fá hann inn í okkar aðalhóp, erum við að hjálpa honum að ná þessu leveli og gera okkar landslið betra. Því hann kemur með allt öðruvísi dýnamík inn í okkar flóru og ég tel að hans leikstíll henti landsliðsumhverfi mjög vel ,“ sagði Arnar.