Ekki búið að slá verkfallsvopnið úr höndum flugstétta

Ríkisstjórnin kom saman í morgun og afgreiddi frumvarp um að stöðva verkfallsaðgerðir flugvirkja með lagasetningu. Til stóð að leggja málið fram á Alþingi í dag. Af því verður ekki þar sem flugvirkjar ákváðu í morgun að aflýsa verkfallinu.

„Ég var að vonast til þess að þessi niðurstaða yrði í ljós í gær eða gærkvöldi, en svo varð ekki. Ég vona að þetta viti á gott um framtíðina en fyrir mér er það algjört neyðarúrræði að ríkisvaldið sé að koma að kjarasamningum með þeim hætti að vera að leggja fram frumvarp og setja lög á kjaradeilur. Það er líka til lausn sem er samningsbundinn gerðardómur sem ég tel að eigi að vera framtíðarlausn í svona málum,“ segir Eyjólfur.

 Hann segir að til hafi staðið að setja lög á verkfallið vegna þjóðhagslegra hagsmuna. Icelandair standi fyrir yfir helmingi millilandaflugs til landsins og innanlandsflugi auk þess sem útflutningur með flugi hafi verið undir.

Samkvæmt yfirlýsingu Icelandair og Flugvirkjafélags Íslands munu samningsaðilar nýta næstu fjórar vikur til viðræðna samkvæmt verkstýrðri viðræðuáætlun ríkissáttasemjara. 

Aðspurður hvort hann sé reiðubúinn að grípa aftur til aðgerða gangi viðræður ekki eftir segist Eyjólfur ekkert geta sagt til um það.

„Þeir ætla að halda áfram að vinna af heilindum og opnum huga að ná samkomulagi með framtíðarhagsmuni starfsfólks og rekstur Icelandair í huga. Og það er gríðarlega mikilvægt og ég vonast til að þetta fari ekki allt í hnút, að það þurfi ekki að koma til þess.“

En er ekki búið að slá verkfallsvopnið að einhverju leyti úr höndum flugstétta fyrst að þetta voru viðbrögðin svona um leið og verkfall hófst?

„Nei, ég tel það ekki vera og ég tel einmitt að Flugvirkjafélag Íslands og Icelandair séu að sýna mikla samfélagslega ábyrgð í þessu máli að halda áfram viðræðum.“

Þannig að þetta væri ekki endilega alltaf lendingin ef það kæmi til dæmis aftur til verkfalls hjá flugvirkjum eða hjá öðrum stéttum innan Icelandair?

„Ég skal ekkert segja til um það. Ég tel að það sé algjört neyðarúrræði að ríkisvaldið sé að grípa inn í kjaradeilur á vinnumarkaði. Aðilar vinnumarkaðarins verða að semja sín á milli.“