Upp­sagnir hjá BBC og verk­föll mögu­leg

„Þetta er kerfisbundið niðurrif sjónvarpsíþróttafrétta hjá BBC eins og við þekkjum þær,“ hefur Daily Mail eftir innanbúðamanni hjá breska ríkisútvarpinu um málið.

41 var sagt upp hjá íþróttadeild BBC í stórum niðurskurði og því fylgja töluverðar áherslubreytingar. Fimm ný störf verða kynnt til sögunnar í staðinn en gert er ráð fyrir að breytingarnar spari BBC um 2,6 milljónir punda árlega, tæplega 420 milljónir króna.

Íþróttafréttir á fréttarás BBC sem gengur allan sólarhringinn verða skornar niður samkvæmt fregnum frá Bretlandi og dregið verulega úr áherslu á sjónvarpsfréttir. Íþróttafréttamönnum hefur verið fækkað úr fimmtán í ellefu.

Breytingunum fylgir áherslubreyting til framtíðar, samkvæmt breskum miðlum. Ný íþróttadeild ríkisútvarpsins einblíni sífellt meira á stutt samfélagsmiðlamyndbönd fram yfir hefðbundnar fréttir.

Töluverð fjárhagsleg pressa hefur verið sett á BBC. Frekari breytinga er að vænta hjá samstæðunni, varðandi bæði framleiðslu sjónvarpsefnis og frétta, þar sem allt að tvö þúsund manns gæti verið sagt upp og stefnt að sparnaði upp á 500 milljónir punda yfir næstu tvö ár, yfir 80 milljarða króna.

Um er að ræða stærsta niðurskurð hjá BBC í 15 ár.

Samkvæmt breskum miðlum er starfsandi á íþróttadeild samstæðunnar við frostmark og mögulegt að gripið verði til verkfallsaðgerða vegna niðurskurðarins.