Stelpurnar fengu medalíur merktar strákum

KR-stelpur unnu HK í vítaspyrnukeppni eftir 2-2 jafntefli í háspennuleik á Meistaravöllum síðdegis í gær. Eftir leikinn tók við verðlaunaafhending með verðlaunum frá KSÍ en þá kom fljótlega í ljós að bæði gullmedalíur KR-inga og silfurmedalíur HK-inga voru merktar fyrir 3. flokk karla en ekki kvenna. Bikarinn var þó rétt merktur.

Innan við tvær vikur eru síðan KSÍ gleymdi að sjá til þess að verðlaunagripurinn væri á staðnum í Kópavogi þegar FH varð Íslandsmeistari í 2. flokki kvenna með sigri á Breiðabliki.

KSÍ brást við mistökunum í Kópavogi með því að Þorsteinn Halldórsson landsliðsþjálfari og Eysteinn framkvæmdastjóri mættu og afhentu FH-stelpum verðlaun sín í hálfleik á leik FH og Stjörnunnar í Bestu deildinni, tveimur dögum eftir að þær unnu titilinn.

Eysteinn segir að sömuleiðis verði brugðist skjótt við hinum leiðu mistökum í Vesturbænum í gær.

„Það voru rangir verðlaunapeningar teknir þegar farið var með þá í Vesturbæinn í gær en réttur bikar var tekinn. Réttum verðlaunapeningum verður komið á bæði félög í dag,“ sagði Eysteinn við Vísi í morgun.

Eysteinn tekur undir að það sé vissulega afar leitt og bagalegt fyrir sambandið að svona mistök hafi nú bitnað á fótboltastelpum tvisvar á skömmum tíma.

„Jú, það er alls ekki gott og erum við miður okkar yfir því. Í tilfellinu í gær voru rangir verðlaunapeningar teknir og þurfum við að skoða verkferlana hjá okkur frá A-Ö en þetta eru svakalega margar verðlaunaafhendingar þessa dagana.

Það breytir því ekki að við þurfum að gera betur og munum við meðal annars reyna að fá félögin í lið með okkur í því hvernig við stöndum að þessum verðlaunaafhendingum í framtíðinni. Við munum strax á morgun ræða þessi mál meðal annars á yfirþjálfarafundi félaganna.

En að því sögðu vil ég fyrir hönd KSÍ koma á framfæri afsökunarbeiðni til félaganna og sérstaklega leikmannanna sem þessi leiðu mistök bitnuðu á í gær.“