Dá­samaði Ronaldo: „Hættir aldrei að vera merkasta tákn­mynd Portúgals“

Ronaldo dró sig skyndilega úr portúgalska hópnum og flaug heim degi fyrir leik við Danmörku í Kaupmannahöfn í vikunni vegna ósættis við landsliðsþjálfarann Jorge Jesus. Ronaldo hafði þá ekkert komið við sögu í 2-1 sigri gegn Noregi í Osló.

Ronaldo hefur skorað 146 mörk í 234 landsleikjum, sem er met, og unnið EM 2016 og Þjóðadeildina tvisvar. Nú gæti landsliðsferlinum verið lokið hjá þessum 41 árs gamla leikmanni en virðingin sem hann nýtur meðal Fernandes og félaga er ákaflega mikil.

Ræddi við Ronaldo og lofaði hann

„Varðandi Cristiano, þá átti ég samtal við hann,“ sagði Fernandes á blaðamannafundi í dag, fyrir leikinn við Noreg í Portúgal annað kvöld.

„Það sem ég sagði við hann, og það sem ég endurtek hér, er að sama hvað gerist, þá mun Cristiano Ronaldo aldrei hætta að vera merkasta táknmynd landsliðsins okkar, fótboltans okkar og landsins, fyrir það sem hann hefur gert ekki aðeins í Portúgal heldur um allan heim.

Hann á sérstakan sess ekki aðeins meðal þeirra bestu frá upphafi, heldur einnig í hjörtum allra Portúgala, og það mikilvægasta er að við hættum að skipta liði.

Það er engin sundrung í landsliðinu. Það er ein heild og verður það áfram, þrátt fyrir allan hávaða sem kann að koma að utan.

Við stöndum utan við þessar deilur en það sem ég bið um er að þjóðin sundrist ekki, taki ekki afstöðu, heldur virði allar hliðar. Cris er og verður stærsta táknmynd landsliðsins okkar, hann á skilið virðingu allra, óháð því hverjum líkar betur eða verr við hann,“ sagði Fernandes.

Vill ræða um Ronaldo eftir leikina

Þjálfarinn Jesus sagði einnig að Ronaldo væri táknmynd Portúgals en að rétti tíminn til að ræða um hann væri eftir yfirstandandi landsleikjatörn. 

„Ég ætla að einbeita mér að liðinu og mótherjunum frá Noregi sem eiga eitt af fimm bestu liðum Evrópu. Það er vandamálið sem ég glími við núna,“ sagði hinn 72 ára gamli Jesus.