Hefur verið orðaður við Stoke

Indriði Sigurðsson hefur verið sterklega orðaður við Stoke City að undanförnu en hefur samt ekki hugmynd um hvort Stoke vilji sig. Fréttablaðið heyrði í honum í gær til þess að kanna stöðu mála. Johan Boskamp, sem er fyrrverandi knattspyrnustjóri Genk, tók nýlega við stjórnartaumunum hjá Stoke City og reynir hann nú að styrkja leikmannahóp félagsins fyrir komandi átök. Indriði sjálfur segist ekki hafa fengið það staðfest að Stoke vilji fá hann. „Ég veit ekki til þess að ég sé að fara neitt, enda er ég samningsbundinn Genk. Þjálfari Stoke City horfði á leik hjá mér um daginn gegn Celta Vigo. Ég trúi því varla núna að hann kaupi mig miðað við frammistöðu mína í þeim leik, en þetta var nú bara æfingaleikur. Celta vann leikinn með tveimur mörkum gegn einu, og við vorum allir svona frekar þungir." Indriði segist vera ánægður hjá Genk, enda eitt stærsta félagið í Belgíu, en neitar því þó ekki að það væri virkilega gaman að spila á Englandi. „Það væri skemmtilegt að spila á Englandi, enda er áhuginn á knattspyrnu gríðarlega mikill þar, og meira að segja í öllum deildum. Stoke City er fínn kostur ef ég skipti um félag á annað borð, en ég hef ekki fengið það staðfest frá neinum að Stoke City hafi áhuga á því að kaupa mig." Undanfarnar vikur hafa leikmenn Genk æft af krafti fyrir komandi tímabil, sem hefst í næsta mánuði. „Það er alltaf svolítið erfitt á þessum tíma þegar leikmenn eru að komast í gott líkamlegt ástand. Maður reynir að komast í sitt besta form og vonandi gengur það vel. Leikmannahópurinn hefur líka verið að styrkjast. Sunday Oliseh, fyrrverandi leikmaður Dortmund, Juventus og Ajax, er til dæmis kominn, og vonandi smellur liðið vel saman fyrir átökin á næsta tímabili."