Sheringham til Djurgarden?

Gamla kempan Teddy Sheringham gæti verið á leið til sænsku meistaranna í Djurgarden, ef eitthvað er að marka orð stjórnarformanns félagsins. Sem kunnugt er leika Íslendingarnir Kári Árnason og Sölvi Geir Ottesen með liðinu.

Sheringam hefur fallið enn aftar í goggunarröðinni hjá West Ham með komu Carlos Tevez til félagsins en hann hefur sýnt að þrátt fyrir háan aldur er hann enn í fullu fjöri. Djurgarden er ríkasta félag Svíþjóðar og hefur lagt mikinn metnað í að fá til liðsins alþjóðlegar stórstjörnur og er þá skemmst að minnast Frakkans Ibrahim Ba sem lék með liðinu í fyrra.

"Við erum að skoða möguleikana fyrir því að fá Sheringam en það er ekkert öruggt," sagði Bo Anderson, stjórnarformaður félagsins, við Fotboldirekt í Svíþjóð en Sheringham lék einmitt með Djurgarden áður en hann sló í gegn í Englandi. "Það er fólk viðriðið félagið nú sem hann þekkir frá tíma sínum hér áður fyrr. Við erum að vona að þessi tengsl geti hjápað okkur," sagði Anderson jafnframt.