Við erum að nálgast okkar besta form

Thierry Henry, franska markamaskínan hjá Arsenal, er sannfærður um að liðið muni brátt finna sitt besta form. Arsenal hefur farið afar hægt af stað í ensku úrvalsdeildinni í ár og aðeins hlotið tvö stig í fyrstu þremur leikjum sínum.

"Við erum ekki að nýta færin gegn andstæðingum okkar og þeir nýta sér það," sagði Henry en um helgina gerði liðið aðeins jafntefli á nýja heimavelli sínum, Emirates, gegn Middlesbrough. Henry vill þó ekki kenna nýja vellinum um ófarir Arsenal. "Öll lið eiga venjulega í vandamálum á fyrsta tímabili sínu á nýjum heimavelli. Ég vona að við eigum ekki eftir að lenda í miklum vandræðum. Annars sjá allir að við erum að spila vel - við erum einfaldlega ekki að nýta færin," sagði hann.

"Ég get ekki sagt að þetta sé einbeitingarleysi, okkur vantar bara þennan herslumun. Við þurfum að halda áfram að berjast og leggja hart að okkur. Ef við höldum áfram að spila svona munu sigrarnir fara að skila sér," bætti Henry við.