Lætur ummæli þjálfara Levski Sofia ekki á sig fá

Stanimir Stoilov, knattspyrnustjóri Levski Sofia, lét hafa eftir sér að Chelsea spilaði ekki nálægt því eins fallega knattspyrnu og Evrópumeistarara Barcelona, en Jose Mourinho segist ekki taka þetta nærri sér.

Sofia fékk 5-0 útreið á Nou Camp í fyrsta leik sínum í riðlakeppni Meistaradeildarinnar fyrir hálfum mánuði og tekur á móti Chelsea í kvöld.

"Það eina sem skiptir okkur máli er að vinna. Við erum ekki með neina leikmenn sem fá áhorfendur til að slefa með hæfileikum sínum, en fyrir mér er sigurinn mikilvægastur," sagði Mourinho. "Lið okkar er byggt fyrir enskan fótbolta og því er dálítið annað að fara á útivelli í Evrópu og mæta liðum sem spila allt aðra knattspyrnu en við. Ef einhver byði mér að vinna leikinn gegn Sofia 1-0 - myndi ég taka því feginn og fara aftur til London," sagði Mourinho.