Chelsea kenndi okkur hvernig á að vinna Barcelona

Fabio Cannavaro, varnarmaður Real Madrid, segir að liðið ætli sér að nota leik Chelsea í gær sem góða lexíu í því hvernig á að vinna Barcelona fyrir leik spænsku risanna á sunnudaginn, en sá leikur verður sýndur beint á Sýn.

"Chelsea sýndi meira hungur og meiri baráttu en Barcelona í gær og við verðum að leika það eftir ef við ætlum að leggja þá á sunnudaginn. Það vantaði að vísu Samuel Eto´o í lið þeirra en þeir hafa menn eins og Eið Smára, Messi og Ronaldinho sem geta skorað mörk. Við vitum allir að Ronaldinho er frábær leikmaður og á móti mönnum eins og honum þarf maður bara að signa sig og vona það besta," sagði Cannavaro á blaðamannafundi fyrir leik ársins á Spáni sem verður í beinni á Sýn klukkan 19 á sunnudaginn.