Þóroddur Hjaltalín fær að dæma í Evrópudeildinni

Þóroddur Hjaltalín Jr. hefur verið settur á leik í forkeppni Evrópudeildar UEFA. UEFA hefur tilnefnt Þórodd sem dómara á viðureign welska liðsins Llanelli AFC og KuPS Kuopio frá Finnlandi. Þetta kemur fram á heimasíðu Knattspyrnusambands Íslands.

Leikurinn fer fram á Stebonheath Park vellinum í Llanelli 12. júli næstkomandi en um er að ræða seinni viðureign þessara liða, sem leika fyrri leikinn í Finnlandi 5. júlí.

Dómarakvartettinn kemur að sjálfsögðu allur frá Íslandi. Aðstoðardómarar verða þeir Sigurður Óli Þórleifsson og Áskell Þór Gíslason, og fjórði dómari verður Magnús Þórisson.

Þóroddur Hjaltalín hefur verið FIFA-dómari síðan 2010. Hann dæmdi leik Häcken frá Svíþjóð og Käerjéng frá Lúxemborg í forkeppni Evrópudeildarinnar í fyrrsumar.