Kolbeinn lagði upp mark í sigri Ajax

Kolbeinn Sigþórsson var í byrjunarliði Ajax sem bar sigur úr býtum á AZ Alkmaar í hollensku úrvalsdeildinni í dag.

Davy Klaasen kom Ajax yfir strax á fimmtánda mínútu leiksins, en Steven Berghuis jafnaði metin fyrir Alkmaar í upphafi síðari hálfleiks.

Lasse Schoene kom svo Ajax yfir tuttugu mínútum fyrir leikslok og Kolbeinn lagði upp þriðja markið fyrir Anwar El-Ghazi sem tryggði sigurinn í uppbótartíma.

Kolbeinn spilaði allan leikinn fyrir Ajax, en þetta var annar sigurinn í tveimur leikjum hjá meisturunum. AZ er með þrjú stig eftir tvo leiki.