Ódýrt að fara á kuldaleikinn

Kuldaspáin er svo svakaleg fyrir leik Minnesota Vikings og Seattle Seahawks í úrslitakeppni NFL-deildarinnar að miðaverðið á leikinn er fáranlegt.

Því er spáð að það verði 18 stiga frost á leiknum og með vindkælingu gæti kuldinn farið niður í 28 stiga frost. Þetta verður einn kaldasti leikur í sögu NFL.

Það eru ekkert allir sem treysta sér í að mæta á völlinn í slíku frosti og því hafa forráðamenn Vikings neyðst til þess að lækka miðaverðið í von um að fylla völlinn.

Sjá einnig: Verður einn kaldasti leikur í sögu NFL-deildarinnar

Ódýrustu miðarnir á leikinn kosta tæpar 6.000 krónur á meðan ódýrustu miðarnir á aðra leiki helgarinnar, í betra veðri, eru að fara á um 18 þúsund krónur.

Þeir sem ætla að sækja leikinn hafa fengið ýmsar leiðbeiningar um hvernig sé best að haga sér í kuldanum. Áhorfendur eru til að mynda hvattir til að taka með sér pappaspjöld til að standa á í stað þess að standa á kaldri steypunni.

Fólk er einnig hvatt til þess að koma með teppi, hanskar verða gefnir á vellinum og kaffið verður frítt.

Úrslitakeppni NFL-deildarinnar verður sýnd í heild sinni á Stöð 2 Sport. Tveir leikir verða sýndir á laugardag og tveir á sunnudag.