Rússneskur lögmaður frá umtöluðum fundi hefur ekki verið yfirheyrður

Natalía Veselnitskaja, rússneskur lögmaður, sem fundaði með syni, tengdasyni og kosningastjóra Donalds Trump árið 2016 segir að sérstakur rannsakandi bandaríska dómsmálaráðuneytisins hafi ekki rætt við hana. Þremenningarnir töldu að Veselnitskaja gæti veitt þeim skaðlegar upplýsingar um Hillary Clinton.

Fundurinn umdeildi átti sér stað í Trump-turninum í júní árið 2016, sumarið fyrir forsetakosningarnar. Donald Trump yngri, elsta syni Bandaríkjaforseta, hafði þá verið lofað upplýsingum sem kæmu sér illa fyrir andstæðing föður hans. Þær upplýsingar kæmu frá rússneskum stjórnvöldum sem reyndu að hjálpa Trump.

Trump yngri tók því boði fagnandi og fékk Jared Kushner, tengdason Trump, og Paul Manafort, þáverandi kosningastjóra framboðsins, með sér á fundinn.

Þegar fjölmiðlar sögðu frá fundinum síðar fullyrti Trump yngri að ekkert hefði komið út úr honum. Þau hefðu aðeins rætt um refsiaðgerðir Bandaríkjanna gegn Rússlandi og ættleiðingar rússneskra barna í Bandaríkjunum. Annað átti hins vegar eftir að koma á daginn.

Bandaríska leyniþjónustan segir að rússnesk stjórnvöld hafi reynt að hafa áhrif á forsetakosningarnar árið 2016 með það fyrir augum að hjálpa Trump að sigra. Robert Mueller er sérstakur rannsakandi dómsmálaráðuneytisins sem kannar hvort að framboð Trump hafi átt í samráði við Rússa.

Efast um sannleiksþorsta Mueller

Í viðtali við AP-fréttastofuna segir Veselnitskaja að það komi henni á óvart að Mueller hafi ekki haft samband við sig. Gefur hún í skyn að það þýði að Mueller „sé ekki að reyna að komast að því sanna“.

Hún segist hins vegar hafa rætt við rannsakendur leyniþjónustunefndar öldungadeildar Bandaríkjaþings sem einnig rannsakar afskipti Rússa af kosningunum. Veselnitskaja ítrekar fyrri orð sín um að hún hafi ekki tengsl við stjórnvöld í Kreml.

 

Gerði lítið úr fundinum með misvísandi yfirlýsingum

Þegar New York Times greindi fyrst frá fundinum gerði Trump yngri lítið úr honum í yfirlýsingu sem sagði ekki allan sannleikann um tilefni hans. Umræðuefnið hafi fyrst og fremst verið ættleiðingar rússneskra barna.

Þegar í ljós kom að honum hafði verið lofað skaðlegum upplýsingum um Clinton fyrir fundinn sagði Trump yngri að Veselnitskaja hafi ekki haft neinar þýðingarmiklar upplýsingar fram að færa.

Rétt áður en New York Times ætlaði að birta frétt um tölvupóstsamskipti Trump yngri við breskan milligöngumann fyrir fundinn birti hann póstana á Twitter-síðu sinni. Í póstunum kom fram að Trump yngri hefði verið lofað skaðlegum upplýsingum um Clinton og að þær væru hluti af stuðningi rússneskra stjórnvalda við föður hans.

„Ef þetta er það sem þú segir þá elska ég það, sérstaklega síðar í sumar,“ var svar Trump yngri við því boði.

Síðar greindi Washington Post frá því að Trump forseti sjálfur hafði lesið fyrir misvísandi yfirlýsingu um fundinn í Trump-turninum sem gefin var út í nafni sonar hans. Lögmaður forsetans neitaði því þó að hann hafi átt þátt í yfirlýsingunni.

Kosningastjórinn ákærður

Manafort hætti sem kosningastjóri Trump í ágúst árið 2016. Þá höfðu komið fram ásakanir um að hann hefði þegið milljónir dollara í greiðslur frá Viktori Janúkóvitsj, fyrrverandi forseta Úkraínu.

Mueller hefur síðan ákært Manafort og Rick Gates, aðstoðarkosningastjóra Trump-framboðsins, fyrir fjölda afbrota, þar á meðal fyrir peningaþvætti á fjármunum sem þeir fengu frá Úkraínu og að skrá sig ekki sem málafylgjumenn erlendra ríkja eins og bandarísk lög mæla fyrir um. Gates er talinn vinna með saksóknurum Mueller.

Manafort er meðal annars sagður hafa skipulagt leynilega fjölmiðlaherferð fyrir ríkisstjórn Janúkóvitsj áður en hann hrökklaðist frá völdum eftir blóðug mótmæli veturinn 2013 til 2014. Sú herferð er talin eiga ýmislegt sammerkt með þeirri sem Rússar réðust síðar í fyrir forsetakosningarnar í Bandaríkjunum.

Herferðin sem Manafort skipulagði beindist þannig meðal annars að Hillary Clinton sem þá var utanríkisráðherra í ríkisstjórn Baracks Obama, þáverandi Bandaríkjaforseta. Obama og Clinton höfðu þá verið gagnrýnin á ríkisstjórn Janúkóvitsj eftir að Júlía Tímósjenkó var hneppt í fangelsi skömmu eftir að hún tapaði í forsetakosningum fyrir Janúkóvitsj.