Opna átta brauta keiluhöll í gamla Nýló-salnum á Kex-hostel

Eigendur Keiluhallarinnar í Egilshöll hyggja á opnun nýs keilusalar í gamla Nýló-salnum á jarðhæð Kex-hostels í miðbæ Reykjavíkur. Þetta staðfestir Jóhannes Ásbjörnsson, einn eigenda Keiluhallarinnar, í samtali við Vísi.

„Þetta hefur verið svona frekar illa varðveitt leyndarmál en það er alveg sjálfsagt að staðfesta að þetta standi til. Í grunninn er það þannig að það stendur til að opna átta brauta keilusal á Kex-hostel,“ segir Jóhannes.

Þjóna keiluunnendum í nágrenni miðbæjarins

Um er að ræða rými sem kennt er við gamla Nýlistasafnið, gamla Nýló-salinn svokallaða, sem er á neðstu hæð Kex-hostels að Skúlagötu 28. Jóhannes segir salinn stóran og mikinn geym og því tilvalinn undir keilusal, sem þurfi mikið rými.

Þá sjá eigendur Keiluhallarinnar og Kex-hostels fyrir sér að mæta keiluþörfum íbúa í miðbænum og nágrenni, sem hingað til hafa þurft að leggja á sig töluvert ferðaleg til að komast í keilu í Reykjavík.

„Það er verið að byggja við sjálft Kex-hostelið þannig að það er verið að taka þetta allt heilmikið í gegn. Hugmyndin er að búa til minni útgáfu af starfseminni sem við erum með í Egilshöll. Hingað til hefur verið langt að fara í keilu fyrir þá sem eru á Seltjarnarnesi og í Vesturbænum en við ímyndum okkur að geta þjónað þessum bæjarhluta.“

Horfa til næsta árs

Aðspurður segir Jóhannes ekki tímabært að negla niður dagsetningu á opnun hinnar nýju keiluhallar.

„Það veltur á því hvernig framkvæmdirnar ganga en eins og staðan er núna er bara risastór hola við hliðina á Kex þannig að ég held það væri óskynsamlegt að fara að kasta fram einhverjum dagsetningum. Í draumaheimi opnum við á þessu ári en það gerist örugglega ekki fyrr en 2020.“

Með opnun nýja keilusalarins verða keilubrautir á höfuðborgarsvæðinu því samtals þrjátíu en salurinn í Egilshöll státar af tuttugu og tveimur brautum. Sú keiluhöll er jafnframt sú eina á höfuðborgarsvæðinu eftir að Keiluhöllinni í Öskjuhlíð var lokað árið 2015.

Þá var keiluhöll til húsa í Mjódd frá árinu 1987 en henni var lokað árið 2006. Einnig voru opnaðir keilusalir á Akranesi og á Akureyri en þeim síðarnefnda var lokað með miklum trega árið 2017.