Allir nema einn samþykktu að hefja frumkvæðisrannsókn

Stjórnskipunar- og eftirlitsnefnd samþykkti á fundi sínum í dag að hefja frumkvæðisrannsókn á verklagi ráðherra í tengslum við aðgerðir gegn peningaþvætti og fjármögnun hryðjuverka. Tillagan var samþykkt með öllum atkvæðum nefndarmanna nema einu.

Á fundi nefndarinnar á mánudag var ákveðið að taka afstöðu til tillögunnar í dag. Hún er komin til vegna þeirrar ákvörðunar FATF-hópsins um að setja Ísland á gráan lista yfir lönd sem hafa ónægar varnir gegn peningaþvætti og fjármögnun hryðjuverka að mati hópsins. Allir nefndarmenn bæði stjórnar og stjórnarandstöðu samþykktu tillöguna, að frátöldum Þorsteini Sæmundssyni, þingmanni Miðflokksins, sem sat hjá og skilaði sérbókun. Þórhildur Sunna Ævarsdóttir, formaður nefndarinnar, segir að vinnan muni hefjast strax í næstu viku.

Sjá einnig: Hefja frumkvæðisrannsókn á verklagi dómsmálaráðherra

„Nefndin sjálf er búin að ákveða að hefja frumkvæðisathugun og það fer venjulega þannig fram að við öflum gagna og svo eigum við eftir atvikum eftir að taka afstöðu til þess hvort að við viljum skipa undirnefnd sem að kannski sinnir þessu nánar, það er ekki búið að taka afstöðu né ákvörðun um það,“ segir Þórhildur Sunna.

„Við ætlum að sjálfsögðu að fara yfir verklag innan ráðuneytanna, það gætu líka verið að þessi málaflokkur hafi eitthvað verið að flakka á milli ráðuneyta, það er að segja ábyrgðin á honum, og þar af leiðandi ætlum við að fá það mjög skýrt hver hefur borið ábyrgð, hvaða ráðuneyti, hvaða stjórnvald hefur borið ábyrgð á því að verða við þessum tilmælum.“

Nefndin hefur ekki gefið sér neinn sérstakan tímaramma fyrir þá vinnu sem fyrir höndum er en athugunin mun hugsanlega ná einhver ár aftur í tímann. „Við erum með bara mjög rúmt tímabil sem að við erum að skoða í þessu samhengi. Ísland er búið að vera aðili að þessum samtökum alveg frá því 1991 og við ætlum ekkert að útiloka það tímabil en okkur finnst þó mikilvægara að skoða strax kannski hvernig hefur verið haldið á málum frá því að við fengum þessa fyrstu stóru skýrslu frá FATF árið 2006 fram til dagsins í dag,“ segir Þórhildur Sunna.